Cari həftənin əvvəlində Yaponiya Mərkəzi Bankının (BoJ) tezliklə geniş miqyaslı təşviq proqramını ləğv etməyə başlaya biləcəyi ilə bağlı ehtimallar fonundan USD/JPY paritetitenində başlayan eniş tendensiyası davam edir. Mərkəzi Bankın dünən açıqlanan dekabr iclasının protokolları göstərdi ki, BoJ ultra-yumşaq pul-kredit siyasətindən çıxmaq üçün vaxt və sürəti müzakirə etməyə hazırdır. Məlumatlar həmçinin Tokioda baza inflyasiyanın yavaşladığını, mərkəzi bankın 2%-lik hədəfindən aşağı düşərək təxminən iki ilin ən aşağı səviyyəsinə gerilədiyini göstərdi.
Nəticədə Yen bir qədər möhkəmlənərək dollara qarşı 147.770-dən təklif olunur.
Bu arada, Avropa Mərkəzi Bankı cümə axşamı faiz dərəcələrini sabit saxlayıb və inflyasiya ilə mübarizəyə sadiqliyini təkrarlayıb. Bununla belə, analitiklər, ECB-nin növbəti iclasında mesajında bir dəyişikliyi nəzərdən keçirə biləcəyini, inflyasiyanın nəzarət altında olduğu görünsə, iyun ayında faiz endiriminə zəmin yarada biləcəyini qeyd edirlər.
AMB-nin faiz qərarı və bank sədri Kristin Laqardın çıxışdan sonra Avro cüzi ucuzlaşaraq 1.0840 hədlərinə düşüb və həftəni 0.5% itki ilə başa vuracağı ehtimal edilir. Bütün gözlər bu gün ABŞ-da açıqlanacaq Şəxsi İstehlak Xərcləri (PCE) Qiymət İndeksinə yönəlib. Qeyd edək ki, baza PCE qiymət indeksinin illik müqayisədə 3% artacağı təxmin edilir.
Ən son məlumatlar ABŞ iqtisadiyyatının dördüncü rübdə proqnozlaşdırılandan daha sürətli böyüdüyünü göstərdi. Hesabatdan sonra ABŞ xəzinə istiqrazlarının gəlirliliyi azalarkən, 10 illik etalon istiqrazın gəlirliliyi son olaraq 4.1126% olaraq qeydə alınıb. Qısamüddətli faiz gözləntilərini əks etdirən iki illik gəlirlilik də bir qədər azalaraq 4.2850%-ə düşüb.
ABŞ dolları güclü ÜDM məlumatları sayəsində dəyər qazanarkən, Britaniya funtu 0.07% ucuzlaşaraq 1.27$-a, Avstraliya dolları isə 0.05% dəyər itirərək 0.6590$-a düşüb.
Neft qiymətləri əvvəlki sessiyada 3% artımdan sonra 82.40$ həddini test etdikdən sonra, bir qədər ucuzlaşıb. “Brent” fyuçersləri 0.4% geriləyərək 82 dollar/barel, ABŞ xam nefti (WTI) isə 0.57% ucuzlaşaraq 76.72 dollar/barel olub. Qırmızı dənizdəki gərginlik neft qiymətlərinə təsir edərək qlobal ticarət üçün risk yaratmaqda davam edir.
Qızıl investorların diqqət mərkəzində olmaqda davam edir və onun qiyməti sonuncu dəfə bir unsiya üçün 2024$ səviyyəsinə qədər bahalaşıb. Lakin “sarı metal” bugünə ucuzlaşma ilə başlayıb və hazırda qiymətli metallar bazarında 2021$-dan satılır.
Məlumat İnvest-AZ İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
