Rusiya vətəndaşlarının Azərbaycana axın etməsi ölkəmizin daşınmaz əmlak bazarında qiymətlərin yüksəlməsi ilə nəticələnəcək.
Eləcə də bax: Səfərbərlikdən sonra ruslar Türkiyədə daha çox mənzil almağa - BAŞLAYIB
FED.az xəbər verir ki, bu barədə "Azərbaycan Qiymətləndiricilər Cəmiyyəti" (AQC) İctimai Birliyinin sədri, iqtisadçı ekspert, «Vecon Consulting» qiymətləndirmə şirkətinin rəhbəri Vüqar Oruc deyib.
Ekspertin sözlərinə görə bir müddət əvvəl Rusiya və Ukrayna arasında müharibənin başlanması daşınmaz əmlak bazarına öz təsirini göstərmiş və qiymətlər artmışdı:
“Rusiya-Ukrana müharibəsi başlayan dövrdə də Ukraynadan Azərbaycana çox sayda gələnlər var idi. Onların gəlişi Azərbaycanda daşınmaz əmlak bazarına ciddi təsir göstərmişdi. Nəticədə ötən ilə nisbətən bu il daşınmaz əmlak bazarında kirayə və alqı-satqı qiymətləri yüksəldi. Bu tendensiya elə bir prosesdir ki, bir hadisə baş verirsə nəticələri özünü tez bir zamanda göstərmir. Fikir versək görərik ki, daşınmaz əmlak bazarında 2021-ci ilə nisbətən 2022-ci ildə qiymətlərin 15-20% artması baş verdi”.
Vüqar Oruc bildirib ki, Rusiyada qismən səfərbərliyin elan edilməsi nəticəsində ölkəni sürətlə tərk edənlərin sayı artır. Ölkədən gedən vətəndaşlar Avropaya, MDB dövlətlərinə xüsusən də qonşu dövlətlərə üz tuturlar. Bundan baqşa, ikili vətəndaşlığı olan şəxslərin geri axın etməsi Azərbaycanda daşınmaz əmlak bazarında qiymətlərin yüksələcəyini düşünməyə əsas verir:
“İlkin dövrdə biz kirayə qiymətlərində artımın şahidi olacağıq. Hal-hazırda kirayə mənzillərin tapılmasında da problem var. Qonşu ölkərdə baş verən proseslər nəticəsində ölkəmizə sürətli axın olarsa istər-istəməz kirayə mənzillərin qiymətinin yüksləlməsinə təsir göstərəcək.
Geri qayıdan Azərbaycan vətəndaşlarının bir hissəsinin burada daşınmaz əmlakı var. Amma daşınmaz əmlakı olmayanlar Rusiyada vəziyyət sakitləşənədək kirayə bazarına üz tutacaqlar. Bu da həmin bazarın qiymətlərinə öz təsirini göstərəcək . İnvestorlar, sahibkarlar mənzilləri kirayə verməyin daha münasib olacağını düşünəcəklər. Ölkəmizə axın nəticəsində yeni daimi mənzilə sahib olmaq istəyənlər də olacaq.”.
Ekspertin sözlərinə görə daşınmaz əmlak bazarına təkcə Rusiya amili yox, həm də İran faktoru təsir göstərə bilər:
“İranda son dövrdə ciddi etirazlar geniş vüsət alıb. Məlum məsələdir ki, orada yaşayan əhalinin böyük əksəriyyəti, otuz beş milyondan nəfərdən çox insan azərbaycanlıdır. Bu cür proseslər davam edərsə oradan da ölkəni tərk etmək istəyənlər ola bilər və cənublu soydaşlarımız Azərbaycana üz tuta bilərlər. Nəticə də onların da axını daşınmaz əmlak bazarına öz təsirini göstər bilər”.
Vüqar Oruc hesab edir ki, daşınmaz əmlak bazarına investisiya qoymaq istəyən ölkə vətəndaşları tələsməlidir: “Hadisələrin sürətli baş verməsi fonunda gözlənilən qiymət artımının neçə faiz olacağını proqnazladırmaq bir az çətindir. Çünki bəzən bazarın təhlili üçün vaxt yetərli olmur. Ancaq hesab edirəm ki, cari ilin sonu və növbəti ilin əvvəllərində yeni sıçrayışın olacağını ehtimal edə bilərik. Ancaq Azərbaycan manatının alıcılıq qabiliyyətinin beynəlxalq inflyasiya səbəbindən təsir gördüyü vaxtda ən düzgün variant yerli investorların alqı-satqı prosesinə həvəslə yanaşmalarıdır”.
