“Global EFC” MMC-nin direktoru Hüseynağa Əliyevin FED.AZ biznes xəbər saytına müsahibəsini təqdim edirik.

DOSYE: Hüseynağa Əliyev Azərbaycan Dövlət İqtisad Universitetinin (UNEC), marketinq ixtisasını bitirib. Daha sonra Niderland Marketing University NİMA Proqramının məzunu olub. O, “Global Education Center” və ONTOP İdman və Əyləncə Mərkəzində menecer, “Meqa Sığorta” sirkətində isə marketinq şöbəsinin müdiri vəzifəsində çalışıb.   

Hörmətli Hüseynağa müəllim, xahiş edirik, şirkətinizin fəaliyyəti haqqında məlumat verəsiniz. 

Bildiyiniz kimi, Hüquqi Şəxs Sığorta Agenti linsenziyasına malik olan “Global EFC” MMC Azərbaycanda bir ildən çoxdur ki, fəaliyyət göstərir. Yeni yaranmış şirkətdir, əsas fəaliyyət istiqamətimiz bütün sığorta növləri üzrə müştərilərə keyfiyyətli və operativ qaydada xidmətlər göstərməkdir. Hazırda şirkətimiz inkişaf edir, yeni işçilər cəlb edilib, portfelimizin genişləndirilməsi istiqamətində var gücümüzlə çalışırıq.  

Müştəriyə sığorta növü üzrə şərtləri izah edərkən əsasən nələrə diqqət etmək lazımdır?

İlk növbədə işçi müştəri ilə səmimi ünsiyyət qurmalıdır. Bu çox vacib bir şərtdir. Məhsulu sadə və aydın dildə izah etmək lazımdır. Texniki və hüquqi terminlərdən mümkün qədər uzaq durmaq, onları sadə misallarla açıqlamaq vacibdir. Müştəri tam anlamalıdır ki, sığorta nəyi əhatə edir və nədən qoruyur. Bundan başqa, tarifə və ödəniş qaydalarına da diqqət edilməlidir. Müştəriyə sığorta haqqının necə hesablandığını, ödənişin nə vaxt və hansı qaydada həyata keçiriləcəyini, güzəştlər və əlavə xidmətlərin olub-olmadığını aydın göstərmək lazımdır. Eyni zamanda müştərinin ehtiyacını düzgün anlamaq lazımdır ki, təklif olunan sığorta növü müştərinin real ehtiyaclarına uyğundurmu? Yəni müştərinin mülkiyyət tipi, risk səviyyəsi, büdcəsi, əvvəlki təcrübəsi nəzərə alınmalıdır. Müştəri sığortanı xərc kimi deyil, özünün və əmlak mənafeyinin təminatı kimi qəbul etməlidir.

Əməkdaşlarınız müştərini sığorta məhsulunu almağa necə inandırır?

Əməkdaş müştərini sığorta məhsulu almağa inandırmaq üçün həm peşəkar satış bacarıqlarından, həm də ünsiyyət və psixologiya prinsiplərindən istifadə etməlidir. Bu proses düzgün yanaşma ilə həm müştəriyə dəyər verir, həm də şirkətin etibarını artırır. Müştərinin real ehtiyaclarını və qarşılaşa biləcəyi riskləri göstərməklə onların qərar verməsinə köməklik göstərirlər. Həmçinin, real nümunələr təqdim edərək sığortanın praktik faydasını vurğulayaraq müştərini inandırırlar. Qeyd edim ki, inandırma alətlərlərindən biri də müştərinin öz dilində izah etməkdir. Eyni zamanda real nümunələr göstərməklə gerçək həyat hadisələri, şirkətin sığorta ödənişləri  digər müştərilərin təcrübələri müştəriləri inandırmağa daha çox çox təsir edir.

2025 və 2026-cı il üçün satış proqnozlarınızla bağlı nə deyə bilərsiniz? Həmçinin satış göstəricilərini artırmaq üçün hansı strategiyaları tətbiq edirsiniz?

Bildiyiniz kimi, şirkətimiz yeni fəaliyyətə başladığı üçün 2025-ci il üzrə cəmi 400 min manat yığım əldə edilib. Lakin yeni işçi resurslarının cəlb edilməsi nəticəsində peşəkar bir komandanın formalaşdırlması bizə imkan verir ki 2026-cı il üzrə 1,5 milyon manat həcmində sığorta portfelinə malik olaq. Bu bizim növbəti il üçün proqnoz və hədəfimizdir.

Satış göstəricilərini artırmaq üçün strategiyamıza gəldikdə isə hər bir sığorta növü üzrə öz yanaşmamız mövcddur. Qısamüddətli strategiyamız var ki, burada əsas istiqamət əsasən kadr resurlarını gücləndirməkdir. Hazırda hər bir sığorta növü üzrə ixtisaslaşan işçi heyəti formalaşdırmışıq. Bu istiqamətlə yanaşı, bazar trendlərini izləyərək fəaliyyətimizi uğurla davam etdiririk.  

Sığorta agentlikləri arasında rəqabət mühitini necə qiymətləndirirsiniz?

Sığorta agentlikləri arasında rəqabət mühiti hazırda həm Azərbaycanda, həm də dünya miqyasında kifayət qədər dinamik, güclü və müxtəlif istiqamətlərdə inkişaf edən bir sahədir. Bu bazar çox rəqabətli bazardır. Sığorta bazarında həm böyük şirkətlər, həm də fərdi agentlər çoxdur. Bu da rəqabəti artırır və hər bir agentlik müştərini qazanmaq üçün daha keyfiyyətli xidmət göstərməyə məcbur olur. Hazırda sığorta agentlikləri arasında rəqabət mühiti güclü, dinamik və müştəri yönümlü şəkildə inkişaf edir. Rəqabətdə üstün olmaq üçün agentliklər peşəkar xidmət, rəqəmsal həllər, şəffaflıq, operativ müştəri dəstəyi, güclü brend reputasiyası təqdim etməlidir. Eyniz zamanda uğurlu olmaq üçün çevik və keyfiyyətli xidmət lazımdır.

Komandanı motivasiya etmək üçün hansı üsullardan istifadə edirsiniz?

Heyətimiz məqsədyönlü, özünə inamı yüksək olan peşəkar işçilərdən ibarətdir. Onlara verilən səlahiyyətin nə qədər mühüm olduğu hədəflərimizi xatırladır. Onların nailiyyətləri hər zaman qeyd edilir. Komandam üçün daim inkişaf imkanları yaradıram.

Müsahibəni apardı:

Elnur Hüseynquluyev

Direktor və baş redaktor