Azərbaycan Mərkəzi Bankı (AMB) 4 illik fasilədən sonra ölkədəki bank olmayan kredit təşkilatlarının (BOKT) sayının yenidən azalmağa başlamasını şərh edib.
Azərbaycanın ən böyük və ən kiçik BOKT-ları - SİYAHI - RENKİNQ (2022)
FED.az xəbər verir ki, AMB-dən bildirilib ki, BOKT-ların dayanıqlı idarəetməsi mütəmadi nəzarətdə saxlanılır və qanunvericiliyə müvafiq tədbirlər görülür.
"Bu ilin I yarısında AMB-nin İdarə Heyətinin müvafiq qərarları ilə “Bank olmayan kredit təşkilatları haqqında” qanuna əsasən fəaliyyətində yol verilmiş pozuntuların aradan qaldırılması barədə nəzarət orqanının göstərişlərinə əməl edilməməsi ilə əlaqədar 3 BOKT-un lisenziyası ləğv edilib. Bununla belə BOKT sektorunun inkişafı diqqət mərkəzindədir və onların fəaliyyətinə dəstək göstərilir. Bu çərçivədə BOKT-lərin inkişafı strategiyasının formalaşdırılması istiqamətində zəruri tədbirlər həyata keçirilir, eləcə də sektorun nümayəndələri ilə qarşılıqlı dialoq formatında sektorun inkişaf perspektivləri, problemlər və onların həlli yolları mütəmadi müzakirə edilir.
AMB cari çağırışları nəzərə alıb bu sahədə qabaqcıl ölkələrin müsbət təcrübələri əsasında “Bank olmayan kredit təşkilatları haqqında” qanuna dəyişikliklər layihəsini qanunvericilik hakimiyyəti orqanına təqdim edib və artıq həmin layihə 3-cü oxunuşda qəbul edilib. Layihədə, BOKT-lara yeni xidmətlərin həyata keçirilməsi imkanının verilməsi ilə bərabər, yeni normativ tələblər və fəaliyyətlərinin daha institusional qurulması çərçivəsində digər tələblər müəyyən edilib", - deyə açıqlamada qeyd olunub. (Report)
