PAŞA Kapital İnvestisiya Şirkəti dünyanın məşhur maliyyə jurnalı olan “International Finance” tərəfindən iki fərqli nominasiya üzrə mükafatlara layiq görülüb.
FED.az xəbər verir ki, Azərbaycan investisiya bazarında ən yüksək dövriyyəyə malik olan PAŞA Kapital, 2023-cü ildə əldə etdiyi nailiyyətlə “International Finance” maliyyə jurnalı tərəfindən “Best Fixed Income Bonds – Azerbaijan 2023”, şirkətin Baş İcraçı Direktoru Ceyhun Hacıyev isə “Best Emerging CEO - Mr. Jeyhun Hajiyev – Investments – Azerbaijan 2023” kateqoriyasında təltif edilib.
“International Finance” jurnalı Böyük Britaniyanın International Finance Publications Limited şirkəti tərəfindən çap edilən premium biznes və maliyyə jurnalıdır. Maliyyə jurnalı tərəfindən həyata keçirilən maliyyə mükafatlandırmaları, əsas fəaliyyəti üzrə dayanıqlı biznes nəticələri nümayiş etdirən, eləcə də regional maliyyə icmalarının bəhrələnə biləcəyi çevik biznes yanaşmaları ilə yaddaqalan maliyyə təşkilatlarını tanıtmaq və təltif etmək məqsədini daşıyır.
Mükafatın təqdimetmə mərasimi yanvar ayının 18-də, Birləşmiş Ərəb Əmirliklərinin Dubay şəhərində baş tutmuşdur. Mərasimdə PAŞA Kapitalı şirkətin rəhbər heyəti təmsil edib.
İnvestisiya şirkətinin Baş İcraçı Direktoru Ceyhun Hacıyev mükafatlandırma ilə bağlı açıqlamasında qeyd edib ki, bu il PAŞA Kapitalın təqdim etdiyi yüksək göstəricilər, xüsusilə artan aktivlər və ticarət həcmi üzrə böyümə komandamızın əzmkar fəaliyyətinin, eləcə də illər boyu investorlarla qurduğumuz etibarlı əməkdaşlığın nəticəsidir. 2023-cü ildə şirkət tarixi rekordu yeniləyərək, 20 milyard 417 milyon manatdan artıq dövriyyə həcmi və 42% bazar payı ilə PAŞA Kapital Azərbaycan bazarının ən iri investisiya şirkəti olub. “International Finance” tərəfindən təqdim edilən mükafatlar komandamız üçün davamlı artan nəticələrin simvoludur.
PAŞA Kapital investisiya şirkətinin qurulmasında və strategiyanın hazırlanıb təsdiq olunmasında əhəmiyyətli rola sahib olan Ceyhun Hacıyev investisiya sahəsindəki uğurlu fəaliyyəti, innovativ yanaşması və özünün liderlik bacarığı ilə daim yüksək səviyyədə müştəri xidməti və əməliyyatlarda mükəmməllik prinsipi ilə seçilir. Ceyhun Hacıyevin müvəffəq təcrübəsinə dayanan idarəçilik modelinin tətbiqində şirkət, kapital bazarlarında öz lider mövqeyini möhkəmlətməsinə nail olur. Belə ki, əldə olunan müsbət nəticələr, şirkətin ictimaiyyət və müştərilərə qarşı olan məsuliyyətini daha da artırmışdır. Həmçinin şirkət rəhbəri olaraq, o, gələcək illərdə də xidmət səviyyəsinin ən yüksək səviyyədə saxlanılmasını və yeni investisiya həllərinin tətbiqini əsas prioritet istiqamət olaraq müəyyənləşdirmişdir.
Qeyd edək ki, şirkətin 2023-ci il ərzində BFB-də 5 milyard 397 milyon manatlıq Dövlət istiqrazları, 2 milyard 211 milyon manatlıq Mərkəzi Bankın notları, 12 milyon 408 min manatlıq repo əməliyyatları üzrə dövriyyəsi olub və bu da PAŞA Kapitalın Azərbaycan kapital bazarlarında lider mövqeyini qoruyub. Eləcə də, korporativ istiqrazlar üzrə şirkətin 397 milyon manat dövriyyəsi olub. Həmçinin şirkətin xarici bazarda ticarət əməliyyatları üzrə ötən il 3 milyard manat həcmində dövriyyəsi qeydə alınıb. Belə ki, PAŞA Kapital gələcək illərdə də xidmət səviyyəsinin ən yüksək səviyyədə saxlanılmasını və investisiya xidmətlərinin daha geniş investor kütləsi üçün əlçatan olmasını əsas prioritet istiqamət olaraq müəyyənləşdirmişdir.
Xatırladaq ki, PAŞA Kapital İnvestisiya Şirkəti 2021-ci ildə eyni jurnal tərəfindən broker kateqoriyalarında da mükafatlandırılıb.
