Aqroparkların yaradılması aqrar sahədə inkişafı sürətləndirməklə bərabər, ixracyönümlü məhsulların sayının artmasında və ölkənin ixrac potensialının güclənməsində əhəmiyyətli rol oynayır.
Eləcə də bax: Birinci yarımillikdə Azərbaycanda istixanalarda pomidor istehsalı - 3% ARTIB
Belə aqroparklardan biri də “Ağsu Aqropark”dır.
Ağsunun Çiyni kəndində ümumi ərazisi 1843 hektar olan aqroparkda yem və toxum zavodu, əkinçilik sahəsi, heyvandarlıq kompleksi fəaliyyət göstərir. Layihə dəyəri 18 milyon manat olan aqroparkda hazırda 200-ə yaxın daimi işçi çalışır.
Aqroparkda ümumilikdə 2200 baş iribuynuzlu südlük və ətlik heyvan bəslənilir. İl ərzində müəssisədə 4 milyon litr süd istehsalı proqnozlaşdırılır. Həmçinin əkinçilik üzrə ixtisaslaşan aqroparkın əkin sahələrində qarğıdalı, arpa, buğda, noxud, həmçinin yonca, vələmir kimi yem bitkiləri əkilib.
“Ağsu Aqropark”ın icraçı direktoru Atababa İsayevin sözlərinə görə, 2021-ci ildə aqroparkda 2584 ton arpa, 3143 ton buğda, 4963 ton silos qarğıdalı, 1395 ton dən qarğıdalı, 444 ton yonca, 2838 ton süd və 66 ton ət istehsal edilib. Cari ilin ötən dövründə aqroparkda 1389 ton süd, 143,7 ton ət, 2583,7 ton arpa, 3142,5 ton buğda yığılıb.
Aqroparkda 5 nasosxana və 6 artezian quyusu istifadəyə verilib, 800 hektar sahədə yüksək standartlara cavab verən pivot suvarma sistemləri qurulub. Əkinçilikdə növbəlilik sistemi tətbiq edilir. Həmçinin toplanılan silosun saxlanılması məqsədilə ərazidə 16 min tonluq beton silos quyuları və 13 min 500 kubmetr taxılsaxlama anbarları tikilib. Burada saatda 5 ton yem istehsal edən, avadanlığı Türkiyədən gətirilən zavod istifadəyə verilib. Həmçinin müəssisənin ərazisində toxumçuluq təsərrüfatı da fəaliyyət göstərir. Toxumçuluq təsərrüfatı il ərzində 10 min ton toxum təmizləmək gücünə malikdir. Müəssisədə 38 traktor və kombayn, 133 digər kənd təsərrüfat texnikasından ibarət nəqliyyat-texnika parkı yaradılıb. “Ağsu Aqropark”ın məhsulları daxili bazarın tələbatının ödənilməsinə yönəldilir.
Qeyd edək ki, Prezident İlham Əliyev avqustun 12-də Ağsu rayonunda “Ağsu Aqropark” Qapalı Səhmdar Cəmiyyətinin fəaliyyəti ilə tanış olub. (Azərtac)
