Azərbaycanda aqrar sahədəki təsərrüfatları sığorta edən Aqrar Sığorta Fondu tərəfindən müxtəlif hadisələr nəticəsində sığortalı fermer və təsərrüfatlara dəyən zərərlər üzrə ödənişləri artır.
Azərbaycanda zərər çəkmiş sığortalı fermerlərə - 6 MİLYON MANAT ÖDƏNILƏCƏK
Fonddan FED.az-a verilən məlumata görə, 2023-cü ilin 11 ayında ölkədə sığortalanmış fermer və təsərrüfatlara ümumilikdə 2 milyon 742 min manat ödəniş edilib. Təsərrüfatlara edilən ödənişlər eyni zamanda həm bitkiçilik, həm də heyvandarlıq üzrə dəymiş zərərləri əhatə edir.
Hesabat dövründə bitkiçilik təsərrüfatları üzrə 2 milyon 44 min manat, heyvandarlıq təsərrüfatları üzrə isə 698 min manat həcmində sığorta ödənişi edilib.
Qeyd edilib ki, Aqrar Sığorta Fondu 2021-ci ildə təsərrüfatlara dəyən zərərlər üzrə fermerlərə 1,7 milyon manat, 2022-ci ildə isə 2,3 milyon manat ödəniş edib. Başqa sözlə, 2023-cü ilin 11 ayında həyata keçirilən ödənişlər əvvəlki illərdən daha artıqdır. Buna səbəb ölkədə aqrar sığorta istifadəçilərinin sayının artması, eləcə də qeyri-sabit hava şəraiti və təbiət hadisələrinin çoxalmasıdır.
Xatırladaq ki, dəyən zərərlərə görə aqrar sığorta ödənişləri yalnız sığortalı fermer və təsərrüfatlara edilir. Aqrar Sığorta Fondu tərəfindən əkin sahələri, bitkiçilik məhsulları, kənd təsərrüfatı heyvanları və balıqçılıq təsərrüfatları sığortalanır. Fermerlərə dəstək məqsədilə sığorta haqqının 50%-i dövlət tərəfindən ödənilir.
Aqrar Sığorta Fondunun göstərdiyi xidmətlər, o cümlədən bitkiçilik və heyvandarlıq təsərrüfatlarının sığortalanması üçün tariflərlə bağlı geniş məlumatı fondun rəsmi internet səhifəsindən (www.asf.gov.az) əldə etmək mümkündür.
