ABŞ-nın Bakıdakı səfirliyi ikinci əl ofis və mətbəx mebeli, məişət texnikası, IT avadanlıqları, kompüter, noutbuk, müxtəlif ofis və məişət əşyaları, qab-qacaq, avtomobil ehtiyat hissələri və bir avtomobil “Mitsubishi Pajero” üzrə canlı hərrac keçirir.

FED.az xəbər verir ki, hərraca çıxarılan avtomobilin (“Mitsubishi Pajero”, ili 2014) gömrük rüsumları ödənilməyib. Rüsum təqribən 24 min manat təşkil edir. Yəni açıq hərracda müəyyən məbləğdə alınan avtomobil üçün əlavə rüsum ödəniləcək.

Hərrac cümə axşamı, 21 aprel 2022-ci il saat 11:00-dan 12:00-ə qədər Məmmədşərif Həmidov, 51 (ABŞ səfirliyinin anbarı) ünvanında keçiriləcək.
Hərracın qaydaları, eləcə də lotlarla saat 09:00-dan 11:00-a qədər tanış olmaq mümkündür. Qalib gəlmiş alıcı mütləq şəxsiyyəti təsdiq edən şəkilli sənəd təqdim etməli və ödənişi Azərbaycan Manatı ilə nağd şəkildə dərhal həyata keçirməlidir.