Yeni Azərbaycan Partiyası Gəncə şəhər Təşkilatının ümummilli lider Heydər Əliyevin anadan olmasının 94-cü ildönümünə həsr etdiyi silsilə tədbirlərin mükafatlandırma mərasimi keçirilib.
Şəhər İcra Hakimiyyətindən APA-ya verilən məlumata görə, İH-nin, şəhər Gənclər və İdman Baş İdarəsinin təşkilatçılığı, “Kapital Bank”ın və ABC (eybisi)-telekom şirkətinin dəstəyi, YAP Gəncə şəhər Təşkilatı Gənclər Birliyinin təşkil etdiyi tədbirdə Gəncə şəhər İH-nin başçısı Elmar Vəliyev, YAP Mərkəzi Aparatının məsul işçisi Rafael Gülməmmədov, AMEA Gəncə Bölməsinin akademik-katibi, akademik Fuad Əliyev, YAP Gəncə şəhər Təşkilatının sədri, millət vəkili Naqif Həmzəyev, Gəncə Dövlət Universitetinin prorektoru, millət vəkili Pərvin Kərimzadə, millət vəkili Mirkazım Kazımov, idarə, müəssisə və təşkilat rəhbərləri, ağsaqqallar, ziyalılar, partiya fəalları və tələbə-gənclər iştirak ediblər.
Gəncə şəhər İH başçısı Elmar Vəliyev bildirib ki, ümummilli lider Heydər Əliyev müstəqil Azərbaycan dövlətçiliyinin siyasi, iqtisadi əsaslarını yaradıb, xalqın müstəqil və güclü dövlətə sahib olmaq arzusunu reallığa çevirib, fenomen şəxsiyyət kimi çağdaş tarixdə əbədiyaşarlıq qazanaraq hələ sağlığında canlı əfsanəyə çevrilib.
E. Vəliyev Heydər Əliyevin yüksək ideallarına daim sadiq qalan gəncəlilərin onun 94-cü ildönümünü böyük coşqu ilə qeyd etdiklərini diqqətə çatdırıb.
YAP Mərkəzi Aparatının məsul işçisi Rafael Gülməmmədov çıxış edərək Gəncə gənclərinin milli dövlət quruculuğu proseslərinin, ictimai-siyasi hadisələrin fəal iştirakçısı olaraq ölkənin sosial-iqtisadi, elmi intellektual potensialının artırılmasına əvəzsiz töhfələr verdiklərini bildirib.
AMEA Gəncə Bölməsinin akademik-katibi, akademik Fuad Əliyev bildirib ki, bu gün Azərbaycan gəncliyi ölkə Prezidenti İlham Əliyevin ətrafında sıx birləşir, onun genişmiqyaslı fəaliyyətini yekdilliklə dəstəkləyir və sürətli inkişafda pay sahibi olmağı özlərinə borc bilirlər.
YAP Gəncə şəhər Təşkilatının sədri, millət vəkili Naqif Həmzəyev əldə olunan uğurlara, qazanılan qələbələrə görə ölkə Prezident İlham Əliyevə, hər bir Gəncə sakininə göstərdiyi diqqətə və dəstəyə görə şəhər İcra Hakimiyyətinin başçısı Elmar Vəliyevə təşəkkürünü bildirib. Millət vəkili qeyd edib ki, Yeni Azərbaycan Partiyasının memarı, müstəqil dövlətimizin banisi Heydər Əliyevin anadan olmasının 94 illiyi ərəfəsində YAP Gəncə şəhər Təşkilatında ənənəvi olaraq, coşqu və təntənə yaşanıb.
Sonra Heydər Əliyevin doğum günü münasibəti ilə keçirilən silsilə tədbirlərin - futzal, şahmat turnirləri, bilik yarışı qaliblərinin mükafatlandırma mərasimi olub, I və II yerləri bölüşdürən komandalar Fəxri fərman və qiymətli hədiyyələrlə təltif ediliblər.
Qeyd olunub ki, Olimpiya sisteminə uyğun olaraq, keçirilən şahmat turnirində Gəncə Dövlət Universitetinin komandası I, Azərbaycan Dövlət Aqrar Universitetinin komandası II, “Heydər Əliyev irsini öyrənirik” adlı bilik yarışında Azərbaycan Dövlət Aqrar Universitetinin komandası I, Gəncə Regional Kollecinin komandası II, Futzal turnirində Gəncə Dövlət Universitetin komandası I, Azərbaycan Texnologiya Universitetinin komandası II yerə sahib olublar.
