Sığorta şirkətləri rəqəmsallaşma və mobil tətbiqetmələr vasitəsilə müştərilərinə daha effektiv, əlçatan və fərdiləşdirilmiş xidmətlər təqdim etməyə çalışırlar. Mobil tətbiqlər istifadəçilərə geniş çeşiddə xidmətlər təqdim edir.

Sığorta şirkətlərinin ödəniş-yığım nisbəti üzrə - RENKİNQİ – (YANVAR-SENTYABR, 2023)

FED.az Azərbaycandakı sığorta şirkətlərinin mobil tətbiqlərinni və tətbiqlər vasitəsilə istifadəçilərə təqdim olunan imkanları araşdırıb.

Araşdırma göstərib ki, Azərbaycanda sığorta şirkətlərinin əksəriyyətinin mobil tətbiqi yoxdur. Hər halda yalnız bir neçə sığorta şirkətinin tətbiqi aktivdir.

A-Group:

Azərbaycanın xüsusilə tibbi sığorta sahəsində brendə çevrilmiş tanınmış sığorta şiruəti olan «A-Group» müştərilərinə daha yaxın olmaq üçün «A-Group Mobile Concierge» mobil tətbiqini hazırlayıb.

Tətbiqin bir sıra özəllikləri var. Tətbiqdəki SOS düyməsi vasitssilə sığorta şirkəti ilə təcili şəkildə əlaqə saxlamaq olur. Hər hansı bir hadisə baş verdiyi zaman sığorta şirkətini xəbərdar etmək üçün zəng etmək , hadisəni izah etmək , təcili yardım və evakuator çağırmaq üçün qəza komissarını gözləmək lazım gəlir. SOS düyməsi bütün bu prosesləri özündə birləşdirir. SOS düyməsini basmaqla hadisə yeri xəritədə müəyyən olunur və qəza komissarı dərhal hadisə yerinə yaxınlaşır;

Hadisə zamanı xəsarət alan varsa qəza komissarını gözləmədən Təcili Tibbi Yardım xidmətini hadisə yerinə çağırmaq mümkündür.

Avtomobil istifadə üçün yararsız vəziyyətə gəlmişsə evakuator düyməsini basmaqla evakuator xidmətindən yararlanmaq olar. Eyni zamanda sığorta şirkətinin ofisinə getmədən bir başa tətbiq vasitəsilə şirkətə müraciət etmək olar.

Tətbiq klinikaların və apteklərin / optikaların onlayn seçimini etməyə imkan verir. İstifadəçilər klinikaların reytinqi ilə tanış ola,  klinikaların, apteklərin və optikaların ünvanlarını xəritədə taparaq lazım olan klinikaya/aptekə qədər məsafənin müəyyənləşdirə və aptekləri / optikaları onlayn qiymətləndirə bilərlər.

Başqa bir özəllik həkim seçmək funksiyasıdır tətbiqdən istifadə edərək hər bir həkim haqqında ətraflı məlumatla tanış ola və seçilmiş həkimin qəbuluna asanlıqla online yazıla bilərsiniz. Hər bir həkimin işini 5 ballıq sistem üzrə qiymətləndirmək mümkündür.

Tətbiqdə şəxsi kabinet bölməsində bütün sığorta polisləriniz haqqında məlumatları əldə etmək mümkündür. Tətbiq istifadəçilərinə sığorta şəhadətnaməsinin uçotu və bitmə tarixini xatırladır.

Atəşgah Sığorta:

“Atəşgah” mobil tətbiqi “Atəşgah” Sığortanın rəqəmsal məhsuludur və tətbiq mobil tətbiq www.ateshgah.com saytının bütün funksiyalarını özündə əks etdirir.

Belə ki, mobil tətbiq vasitəsilə istənilən məhsulu onlayn şəkildə əldə edə, aktiv və mövcud sığorta şəhadətnamələrinizi izləyə və nəzarət edə, ödənməli olan sığorta şəhadətnamələrinin ödənişini həyata keçirə bilərsiniz. Bundan əlavə, baş vermiş sığorta hadisəsinin ödəniş prosesinin statusu barədə məlumatı müştəri koduna əsasən əldə edə, lazım olan sənəd siyahısını nəzərdən keçirə və ödəniş üçün ehtiyac duyulan sənədləri yükləyə bilərsiniz.

Paşa sığorta:

Oxşar funksiyaları «Paşa Sığorta»nın tətbiqi də təklif edir. Mobil proqram vasitəsilə müştərilər aktiv şəhadətnamələrə baxa, ödənişlər edə, baş vermis hadisələri izləyə, avto üzrə hadisə yerindən şəkilləri əlavə edərək hadisə bildirmə imkanı əldə edə bilərlər.

Tətbiq vasitəsilə həkimə yazılmaq üçün qeydiyyat və həkimə gediş tarixçələrini izləmə imkanı da var. Eyni zamanda mobil tətbiq istifadəçisi sığorta şirkətinin əməkdaşlıq etdiyi aptek, klinikaların əlaqə nömrəsi və ünvanı ilə tanış olma imkanı qazanır.