“Bakı Fond Birjası” QSC-nin (BFB) cəmi aktivləri bu il yanvarın 1-nə 3,21 mln. manat təşkil edib.
Birjanın maliyyə hesabatına görə, bu, ötən il yanvarın 1-i ilə müqayisədə 4,5% azdır.
BFB-nin aktivlərinin 79,4%-ni və yaxud kredit təşkilatlarından alınacaq məbləğlər təşkil edib. 2016-cı ildə bu rəqəm 1,2% azalıb.
Ötən il Birjanın cəmi öhdəlikləri 46% azalaraq 40 min manata, cəmi kapitalı isə 3,6% azalaraq 3,287 mln. manata düşüb.
2016-cı ildə BFB-nin gəlirləri 1,104 mln. manat (2015-ci ilə nisbətən 18,6% az), xərcləri isə 1,221 mln. manat (5,7% az) təşkil edib. Son nəticədə şirkətin vergiyəqədərki zərəri 117 min manat olub.
Ötən il BFB cəmi 480 manat (əvvəlki ilə nisbətən 53,4 dəfə az) mənfəət vergisi ödəyib və ili 116 min manat xalis zərərlə başa vurub. Qeyd edək ki, Birja 2015-ci ildən 36 min manat xalis mənfəətlə çıxmışdı. Başqa sözlə, maliyyə qurumu mənfəətdən zərərə keçib.
Xatırladaq ki, BFB 1997-ci ildə yaradılıb. Onun nizamnamə kapitalı 1,26 mln. manatdır. Birjanın səhmdarları 20 hüquqi şəxsdir. Bunların arasında 5 yerli bank ("Azər-Türk Bank", “Azərbaycan Sənaye Bankı” (ASB), "Kapital Bank", "Azərbaycan Beynəlxalq Bankı" və ləğvetmə prosesində olan "United Credit Bank" ASC-lər), 14 yerli və xarici investisiya şirkəti, hətta İstanbul Fond Birjası (“Borsa İstanbul”) var. ASB istisna olmaqla, digər səhmdarların BFB-də payı 4,76%-dir. ASB isə Birjada 9,52% payla təmsil olunub.
