Qazaxıstanın "Vahid Pensiya Yığımı Fondu" SC "Azərbaycan Beynəlxalq Bankı" ASC-nin (ABB) qiymətli kağızlarına yatırdığı investisiyanın bir qismini qaytarmağı bacarıb. "Sputnik" agentliyinin yaydığı xəbərə görə, bunu Fondun Direktorlar Şurasının üzvü Kayrat Kelimbetov bildirib.
"2014-cü ilin oktyabr ayında 45 mlrd. təngə məbləğində investisiya yatırılıb. Xatırlayırsınızsa, o zaman 1 dollar 180 təngəyə bərabər idi. Buna görə, biz Azərbaycan Beynəlxalq Bankının qiymətli kağızlarına 250 mln. dollar yatırdıq. Termin dili ilə danışsaq, ilk növbədə bu illər ərzində investisiyamız devalvasiyadan qorunub. Artıq ödənişlərə başlanılıb. Təəssüf ki, bu məlumatı açıqlamırlar, lakin biz kupon ödənişləri üzrə artıq 50 mln. dollar qaytara bilmişik. Bugünkü məzənnəyə əsasən, bu, 17 mlrd. təngə təşkil edir. Başqa sözlə, 45 mlrd. təngə yatırmışıq, 17-si qayıdıb", - deyə o bildirib.
Xatırladaq ki, ABB xarici kreditorlar qarşısındakı öhdəliklərin könüllü restrukturizasiyası ilə bağlı səsvermə prosesinin iyunun 19-dan başlandığını və bu prosesin 18 iyul 2017-ci il tarixində tamamlanacağını açıqlayıb.
Xarici kreditorlardan daxil olmuş müəyyən təkliflərin nəzərə alındığı və Maliyyə Nazirliyi ilə razılaşdırmaqla restrukturizasiya planında bəzi dəyişikliklərin edildiyi bildirilib.
Qanunvericiliyin tələblərinə uyğun olaraq könüllü restrukturizasiya planında edilmiş dəyişikliklər barədə məlumatlar təqdim edilir:
• Azərbaycan Respublikası tərəfindən buraxılacaq yeni istiqrazların ödəniş şərtlərində dəyişiklik edilib. Belə ki, istiqrazlar üzrə ödənişlər son 3 ildə başlayacaq. Bu, əvvəl son 2 il olaraq müəyyənləşdirilmişdi.
• Kreditorlara müxtəlif şərtli dövlət istiqrazlarını seçmək imkanı verilir. Kreditor xüsusi vəkalət forması və ya səsvermə prosedurundan istifadə etməklə təklif olunan fərqli seçimlərdən istifadə edə biləcək.
• “İlk gələn - ilk seçən” mexanizmi də “ilk 11 iş günü müraciət” edənlərin üstünlüyü mexanizminə dəyişdirilib. Bu müddət ərzində səsvermədə iştirak edən kreditorlar seçimlərinin reallaşmasında müəyyən üstünlüklərə malik olacaqlar.
• Subordinasiya xarakterli və digər (ticarətin maliyyələşdirilməsi üzrə əqdlər istisna olmaqla) öhdəliklər üzrə faizlərin təmin edilməsi şərtləri aşağıdakı şəkildə müəyyənləşdirilir:
- Hesablanmış faizlərlə bağlı tələb hüququ yalnız könüllü restrukturizasiya planının lehinə səs verən iddiaçılara aid olacaq.
- Borclar üzrə faizlər 1 sentyabr 2017-ci il tarixinədək (əvvəlcə 13 iyul 2017-ci il müəyyən edilmişdi) hesablanacaq və restrukturizasiya planının bir hissəsi kimi buraxılan yeni istiqrazlar üzrə faizlərin hesablanması da bu tarixdən başlanacaq.
- 1 sentyabr 2017-ci il tarixinədək sözügedən öhdəliklərlə bağlı hesablanmış faiz ödənişləri müvafiq paylanma tarixində nağd olaraq iddiaçılara ödəniləcək. Lakin, 1 sentyabr 2017-ci il tarixinə qədər bütün digər hesablanmış, lakin ödəmə vaxtı çatmamış faizlər isə kapitalizasiya ediləcək və iddiaçıların yeni istiqrazlarının əsas məbləğinin hesablanmasında nəzərə alınacaq.
