Bugün ABŞ-da “Conference Board” İstehlakçıların İnam İndeksinin dərc olunması ərəfəsində beynəlxalq birjalarda dollar major valyutalar qarşısında ucuzlaşmaqda davam edir. Ötən gün ərzində EURUSD cütlüyü 1.1200 səviyyəsini test etdi. Bu hədd son bir ilin maksimumudur. Eləcə də, GBP/USD valyuta cütlüyüdə artım tendensiyasını davam etdirir. Dünən 1.3221 səviyyəsinə qədər bahalaşan funt/dollar məzənnəsi ötən gün ərzində 1.3181 səviyyəsinin üzərində üfüqi tendensiyanı qoruyub.
Hal-hazırda EUR/USD, GBP/USD və USD/JPY cütlükləri müvafiq olaraq 1.1170, 1.3197 və 144.650 səviyyələrində ticarət olunurlar. Dollar indeksi isə 100.42 bənd təşkil edir. Qızılın qiyməti 2500$ səviyyəsinin üzərində möhkəmlənməyə davam edir. Ötən gün 2526$ səviyyəsinə qədər bahalaşan dəyərli metal, sonradan bir qədər ucuzlaşıb və hal-hazırda 2510$ səviyyəsində ticarət olunur.
Bazar ertəsi beynəlxalq birjalarda “Brent” markalı neftin bir barreli 1.91%, “WTI” markalı neftin bir barreli isə 2.65% bahalaşıb. Bir gün əvvəl qiymətlərin artımı Liviyanın şərqində hökumətin bütün neft yataqlarında fors-major hallar səbəbindən neft hasilatın və ixracın dayandırılması ilə bağlı bəyanatı ilə dəstəkləndi.
Səhm bazarında isə “Apple” şirkətinin səhmləri diqqət mərkəzindədir. Belə ki, şirkətin saytındakı məlumata görə, “Apple” sentyabrın 9-da payız təqdimatını keçirəcək. Qeyd olunur ki, tədbir çərçivəsində “Apple” “iPhone 16”-nı, həmçinin “Air Pods” qulaqlıqlarının və “Apple Watch” smart saatlarının yeni modellərini təqdim edəcək.
Avropanın ən böyük iqtisadiyyatı olan Almaniyanın ÜDM-i ikinci rübdə analitiklərin fikrincə rüblük ifadədə 0.1% azalıb. Qeyd olunan məlumatlar bugün Bakı vaxtı ilə saat 10:00-da ölkənin Federal Statistika Bürosunun (Destatis) açıqlamasında dərc olunacaq.
Həmçinin, Bakı vaxtı ilə saat 18:00-da “Conference Board” analitik şirkəti ABŞ-da İstehlakçı İnamı İndeksini dərc edəcək. Ekspertlərin fikrincə, avqust ayında indeks 100.3 bənd səviyyəsindən 100.6 bənd səviyyəsinədək yüksəlib.
Məlumat İnvestAZ İnvestisiya Şirkətinin analitikləri tərəfindən hazırlanıb.
