Neft qiymətləri bazar ertəsi səhər Səudiyyə Ərəbistanına qarşı yeni Husi hücumları və Hörmüz boğazında baş verən yeni zərbələrin regionda tədarükün pozulması ilə bağlı narahatlıqları artırması fonunda kəskin yüksəlib.
FED.az xəbər verir ki, İran və Fars körfəzinin digər ölkələri arasında Hörmüz boğazı ilə bağlı keçirilməsi planlaşdırılan danışıqların təxirə salınması da tədarük riskləri ilə bağlı narahatlığı gücləndirib. Bu vəziyyət neft qiymətlərində geosiyasi risk mükafatını artıraraq xam nefti ilin ən yüksək səviyyələrinə yaxın saxlayıb.
ABŞ-ın WTI markalı xam neftinin fyuçersləri isə 3,9% bahalaşaraq bir barel üçün 102,84 dollara çatıb.
Husilər Səudiyyə Ərəbistanına və Babülməndəbdə gəmiçiliyə hücum edib
Neftin bahalaşmasının əsas səbəblərindən biri Yəməndəki Husi qüvvələrinin həftəsonu Səudiyyə Ərəbistanındakı yeni hədəflərə hücum etməsi olub.
İranla yaxın əlaqələri olan Husilər Babülməndəb boğazında maneəsiz hücumlar həyata keçirməyə, eləcə də Səudiyyə Ərəbistanının mühüm enerji obyektlərini hədəfə almağa imkan verən mövqelər əldə ediblər.
Bundan əvvəl Husilər ötən həftə Səudiyyə Ərəbistanında bir sıra mühüm obyektlərə, o cümlədən “Aramco”nun neft emalı zavoduna və yanacaq terminalına, bir neçə yanacaq obyektinə və hava limanlarına, həmçinin Babülməndəb boğazında gəmilərə zərbələr endirmişdilər.
Son hadisələr Yaxın Şərqdə neft daşımaları üçün daha bir mühüm marşrutun risk altına düşməsi deməkdir. Xüsusilə nəzərə alınır ki, Səudiyyə Ərəbistanının Hörmüz boğazından keçən neft daşımalarının əhəmiyyətli hissəsi alternativ olaraq Babülməndəb istiqamətinə yönəldilmişdi.
Səudiyyə Ərəbistanı yeni Husi hücumlarından sonra mühüm Şərq-Qərb neft boru kəmərinin fəaliyyətini dayandırdığını açıqlayıb. Məlumatlara görə, Husilər həftəsonu ölkədə əlavə hədəfləri vurub və Babülməndəb boğazında gəmiçiliyə qarşı yeni hücumlar həyata keçiriblər.
ANZ analitikləri bildiriblər ki, Ər-Riyad Hörmüz boğazında vəziyyət yenidən pisləşəcəyi halda nefti qərb istiqamətindən ixrac etmək imkanını faktiki olaraq itirib.
Analitiklərin fikrincə, bu vəziyyət cari həftə ərzində neft qiymətləri üzərində əlavə yüksəliş təzyiqi yarada bilər.
Oman: Hörmüzlə bağlı danışıqlar təxirə salınıb
Omanın xarici işlər naziri Seyid Bədr əl-Busaidi bazar günü bildirib ki, İran ilə Körfəz ölkələri arasında bazar ertəsi keçirilməsi planlaşdırılan regional görüş təxirə salınıb.
Görüşün keçiriləcəyi barədə məlumat ötən həftə neft qiymətlərində artımı müəyyən qədər məhdudlaşdırmışdı. Bazar iştirakçıları diplomatik təmasların bərpasının regiondakı neft tədarükü risklərini azalda biləcəyinə ümid edirdilər.
Lakin görüşün qeyri-müəyyən müddətə təxirə salınmasından sonra Hörmüz boğazında gərginliyin yaxın müddətdə davam edəcəyi gözlənilir.
Avqust ayında ABŞ və İran arasında hərbi qarşıdurmanın yenidən kəskinləşməsindən sonra Hörmüz boğazı vasitəsilə neft daşımaları müharibədən əvvəlki səviyyələrin yalnız kiçik bir hissəsinə qədər azalıb.
