“International Leasing” ASC nizamnamə kapitalını 1 milyon manat artıraraq 2 milyon manata çatdırmağa hazırlaşır.

FED.az xəbər verir ki, şirkət kapital artımı məqsədilə hər birinin nominal dəyəri 50 manat olan 20 min ədəd yeni adi, adlı, sənədsiz səhm buraxacaq. Beləliklə, emissiyanın ümumi nominal həcmi 1 milyon manat təşkil edir. Mərkəzi Bankın Məlumatların Elektron Açıqlanması Sistemində yeni emissiya 9 sentyabr 2026-cı ildə açıqlanıb.

Hazırda “International Leasing”in nizamnamə kapitalı 1 milyon manatdır və şirkətin mövcud səhmlərinin nominal dəyəri də 50 manat olduğundan hazırda dövriyyədə ümumilikdə 20 min səhm var. 

“International Leasing”in 3 səhmdarı var - Nicat Həsənov – 45%, Rifat Həsənov – 45%, Leyla Cabbarova – 10% paya malikdir.  Şirkətin ödənilmiş nizamnamə kapitalı hazırda 1 milyon manatdır.

Nicat və Rifat Həsənov birlikdə şirkətin 90%-nə sahibdir

Hazırkı strukturda Nicat və Rifat Həsənov qardaşları birlikdə “International Leasing”in 90%-lik payına nəzarət edirlər.

Onların hər biri ayrı-ayrılıqda 45%-ə, Leyla Cabbarova isə 10%-ə sahibdir.

Əgər iki qardaş kapital artımında öz paylarına mütənasib şəkildə iştirak etsələr, birlikdə şirkətin 90%-lik nəzarətini saxlayacaqlar.

Şirkətin nizamnaməsində göstərilən mövcud səhmdar strukturu belədir: 

Kapital artımından sonra səhmlərin sayı 40 minə çatacaq

Yeni emissiyadan sonra şirkətin səhmlərinin sayı 20 mindən 40 minə, nizamnamə kapitalı isə 1 milyon manatdan 2 milyon manata yüksələcək.

Şirkətin indiki səhmdarların yeni səhmləri öz hazırkı paylarına mütənasib şəkildə almaq üstünlük hüququ var. Hər üç səhmdar üstünlük hüququndan tam istifadə etsə, hazırkı pay bölgüsü dəyişməyəcək.

Şirkət iki il əvvəl də böyük kapital artımı edib

Xatırladaq ki, “International Leasing” 2024-cü ildə də səhm emissiyası etmişdi. Həmin vaxt şirkət 1 milyon manatlıq səhm emissiyası ilə kapitalını kəskin artırmışdı. Həmin vaxt şirkətin nizamnamə kapitalı cəmi 50 min manat idi və bütün səhmlər Nicat Həsənova məxsus idi. Yeni emissiyadan sonra səhmdar bazası dəyişdi və sonrakı mərhələdə hazırkı 45%-45%-10% strukturu formalaşdı.

Anderrayter “PAŞA Kapital”dır

Budəfəki səhm buraxılışının anderrayteri “PAŞA Kapital İnvestisiya Şirkəti” QSC olacaq. Səhmləri almaq istəyən investorlar BFB üzvü olan digər investisiya şirkətlərinə də müraciət edə biləcəklər.