Birja

Qiymətli kağızlar bazarı azalıb - PALATA GÖSTƏRİCİLƏRİ AÇIQLADI

Qiymətli kağızlar bazarı azalıb - PALATA GÖSTƏRİCİLƏRİ AÇIQLADI | FED.az
12:27 31 Okt 2019

FED.az xəbər verir ki, Maliyyə Bazarlarına Nəzarət Palatasının yaydığı məlumata görə, 2019-cu ilin doqquz ay ərzində investisiya qiymətli kağızları bazarında ümumilikdə 12 milyard 71.5 milyon manat həcmində əməliyyat aparılıb. Əməliyyatların 80.1%-i (9 milyard 666 milyon manat) ilkin bazarda, 19.9%-i (2 milyard 405.6 milyon  manat) isə təkrar bazarda aparılıb.

Eləcə də bax: Palata: Bəzi Foreks şirkətləri müştərilərin - QAZANMASINA QƏSDƏN MANE OLUR

Cari ilin yanvar-sentyabr ayları ərzində qiymətli kağızlarla ilkin bazar əməliyyatları ötən ilin müvafiq dövrü ilə müqayisədə 9% azalıb, təkrar bazar əməliyyatları isə 69% artıb.

Korporativ qiymətli kağızlar

Eləcə də bax: Azərbaycanda qiymətli kağızlarla əməliyyatlar üzrə – TARİFLƏR AZALDILACAQ

2019-ci ilin doqquz ayı ərzində real sektor təmsilçilərinin və maliyyə institutlarının fond bazarı vasitəsilə öz vəsaitlərini artırmaq təşəbbüsləri korporativ qiymətli kağızlar bazarının korporativ istiqrazlar seqmentində əməliyyatların həcminin ötən ilin müvafiq dövrü ilə müqayisədə 42.1% (447.9 milyon manat) artmasına səbəb olub. Əlavə olaraq, korporativ istiqrazların ilkin bazarında bağlanan əqdlərin məbləği əvvəlki hesabat dövrü ilə müqayisədə 20.7% artaraq 759.3 milyon manata çatıb.

Dövlət qiymətli kağızları

Hesabat dövründə dövlət qiymətli kağızları bazarında əqdlərin həcmi ötən ilin müvafiq dövrü ilə müqayisədə 3% azalaraq 9 milyard 315.3 milyon manat təşkil edib. Bunun 951,7 milyon manatını dövlət istiqrazları, 8 milyard 363.6 milyon manatını isə Mərkəzi Bankın notları təşkil edib. Dövr ərzində dövlət istiqrazlarının yerləşdirilməsi üzrə 27 hərrac, Mərkəzi Bankın notlarının yerləşdirilməsi üzrə isə 40 hərrac keçirilib və müvafiq olaraq, 527 milyon manat və 8 milyard 140 milyon manat məbləğində yerləşdirmə olub.

Repo əməliyyatları

Hesabat dövründə qiymətli kağızlarla keçirilən repo əməliyyatlarının ümumi məbləği 842,9  milyon manat olub. Dövlət istiqrazları ilə repo əməliyyatlarının həcmi ötən ilin müvafiq dövrü ilə müqayisədə artım nümayiş etdirərək 490,4 milyonmanat təşkil edib.

Qeyd edək ki, ötən dövrlərin hesabatında əks olunmuş fərq müqavilələri ilə marja ticarəti əməliyyatları üzrə statistik məlumatlar bu hesabatlığa daxil edilməmişdir.

2019-cu ilin birinci yarısı üzrə investisiya qiymətli kağızları bazarının əsas göstəriciləri icmal göstəricilərdə öz əksini tapıb.

Digər xəbərlər