2023-cü ilin yanvar-avqust aylarında Azərbaycana dünyanın 183 ölkəsindən 1 milyon 343,7 min nəfər səfər edib. Bu ötən ilin eyni dövrünə nisbətən 33,8 faiz artıqdır.

FED.az xəbər verir ki, ölkəyə ən çox turist Rusiyadan gəlir – 426 min nəfər və ya bütün turistlərin 32%-i şimal qonşumuzdan gəlib. Ötən illə müqayisədə Azərbay  cana gələn rus turistlərinin sayı 163 min nəfər və ya 62% artıb.

Turistlərin 238 min nəfəri və ya 17,7 faizi Türkiyədən gəlib. Bu ötən illə müqayisədə 39 min nəfər artıqdır. İrandan gələn turistlərin sayında isə azalma var – bu il ölkəyə 101 min nəfər İranlı turist gəlib, yəni bütün turistlərin 7,5 faizi. Əvvəlki illə müqayisədə iran turistlərinin sayı 9 min nəfər azalıb.

Səudiyyə Ərəbistanından gələn turistlərin sayında da ciddi azalma var – 2022-nin 8 ayında bu ölkədən Bakıya 87 min turist gəlmişdisə, 2023-ün eyni dövründə 59 min turist gəlib.

Onların yerini Gürcüstandan və Hindistandan gələn turistlər tutub.

Belə ki, bu ilin 8 ayında Azərbaycana Gürcüstandan 63 min turist gəlib – artıb 16 min nəfərdir. Hindistandan isə Azərbaycana gələnlərin sayı 2,4 dəfə artaraq 27 min nəfərdən 66 min nəfərə çatıb.