Azərbaycanda dövlət qeydiyyatında olan minik avtomobillərinin sayı 2022-ci ildə 2021-ci illə müqayisədə 70 min 563 ədəd artaraq 31 dekabr 2022-ci il tarixində 1 milyon 419 min 870 ədədə çatıb.
Azərbaycanda avtomobillər üçün - YENİ PARKİNQ QİYMƏTLƏRİ QÜVVƏYƏ MİNİB - SİYAHI
FED.az Dövlət Statistika Komitəsinə istinadən xəbər verir ki, ötən il Azərbaycanda ən çox Toyota (+13 min 435), Hyundai (+12 min 8), KİA (+11 min 598), Opel ( +6 min 578), Chevrolet (+5 min 198), Nissan (+3 min 411), Mercedes (+3 min 256), BMW (+2 min 817), Honda (+1 min 683), Ford (+1 min 371) və Land Rover (+859) avtomobillərinin sayı artıb.
Qeyd edək ki, taksi xidməti fəaliyyəti üçün daha çox alınan Toyota Prius modeli nəzərə alınmasa, ötən il də Azərbaycanda ən çox Hyundai markalı avtomobillər alınıb. Ötən il Azərbaycanda dövlət qeydiyyatında olan Hyundai avtomobillərinin sayı ilk dəfə 100 min ədəd səviyyəsini keçərək 105 min 833 ədədə çatıb.
2022-ci ildə Çin markalarının avtomobillərinin sayında da ciddi artım olub. Changan, Geely, Chery, FAW və MG avtomobillərinin sayı nəzərəçarpacaq dərəcədə artıb.
Ötən ilin sonuna olan məlumata görə, Azərbaycanda ən çox VAZ, Mercedes, Hyundai, Toyota, KİA, Chevrolet, Opel, Nissan, BMW, GAZ və Mitsubishi markalı avtomobillərdən istifadə olunur.
Qeyd edək ki, 2022-ci ildə Azərbaycanda cəmi nəqliyyat vasitələrinin (minik və yük avtomobiləri, avtobuslar, motosikllar, xüsusi vasitələr) sayı 78 min 510 ədəd artaraq 1 milyon 645 min 253 ədədə yüksəlib. Ötən il hər 1000 nəfərə 162 ədəd avtomobil, il hər 1000 nəfərə 141 ədəd minik avtomobili, hər 100 ailəyə isə 58 ədəd şəxsi minik avtomobili düşüb.
Xatırladaq ki, 2021-ci ildə Azərbaycanda minik avtomobillərinin sayı 84 min 765 ədəd artaraq 1 milyon 349 min 307 ədədə yüksəlmişdi. Həmin il hər 1000 nəfərə 156 ədəd avtomobil, 135 ədəd minik avtomobili və hər 100 ailəyə isə 59 ədəd minik avtomobili düşmüşdü.
2021-ci ildə Azərbaycanda ən çox Toyota (+16 min 736), Hyundai (+12 min 754), KİA (+12 min 93), Chevrolet (+10 min 824) və Opel (+8, min 532) markalı avtomobillər artmışdı. (Marja)
