2017-ci ilin əvvəlindən Bakı şəhərinin əhalisinin sayı 3700 nəfər və ya 0,2% artaraq aprel ayının 1-nə 2 mln. 249,5 min nəfərə çatıb.
Bakı Statistika İdarəsindən verilən məlumata görə, əhalinin 49,6%-ini kişilər, 50,4%-ini qadınlar təşkil edir. Bir kvadrat kilometrə düşən əhalinin sıxlığı 1051 nəfər olub.
2017-ci ilin yanvar-mart aylarında Bakı şəhəri üzrə əhalinin ümumi artımı əsasən təbii artım hesabına baş verib.
Cari ilin yanvar-mart ayları ərzində Ədliyyə Nazirliyinin rayon (şəhər) qeydiyyat şöbələri tərəfindən Bakı şəhərində 7336 doğulmuş körpə qeydə alınıb və bu göstərici əhalinin hər min nəfərinə hesabı ilə 13,2 təşkil edib. Doğulanların 92-si əkiz, 1-i isə üçəmdir. Doğulan körpələrin 3846 nəfəri, yəni 52,4%-i oğlan, 3490 nəfəri, yəni 47,6%-i isə qız uşağıdır.
Hesabat dövründə Bakıda 3556 ölüm halı qeydə alınıb və əhalinin hər 1000 nəfərinə ölüm səviyyəsi 6,4 təşkil edib.
2017-ci ilin ilk 3 ayı ərzində qeydiyyat şöbələri tərəfindən 2957 nikah və 1134 boşanma halları qeydə alınıb. Əhalinin hər 1000 nəfərinə nikahların sayı 5,3, boşanmaların sayı isə 2 olub.
