Azərbaycanın ilk təkrarsığorta şirkəti "AzRe Təkrarsığorta" ASC 2017-ci il üzrə konsolidə edilmiş maliyyə hesabatını açıqlayıb.

FED.az xəbər veirir ki, ASC ötən ili 22 milyon 62 min manat xalis mənfəət ilə başa vurub. Şirkət 2016-cı ildə 18 milyon 320 min manat, 2015-ci ildə 14 milyon 171 min manat qazanc götürmüşdü. 

2016-cı illə müqayisədə ötən il "AzRe Təkrarsığorta"nın ümumi sığorta və təkrarsığorta mükafatları 13% azalaraq 80 milyon 538 min manatdan 70 milyon 142 min manata düşüb (10 milyon 396 min manat azalma).

İllik müqayisədə ümumi ödənilmiş iddialar 35 milyon 286 min manatdan 29 milyon 600 min manata düşüb. Şirkətin faiz gəlirləri 7 milyon 580 min manatdan 9 milyon 570 min manata yüksəlib. Eyni zamanda, satış komissiyaları 11 milyon 884 min manatdan 7 milyon 238 min manata azalıb. Bütün bu amillər, sığorta və təkrarsığorta mükafatlarının azalmasına baxmayaraq xalis mənfəətin 2016-cı illə müqayisədə yüksək olmasını təmin edib.

2016-cı illə müqayisədə ötən il şirkətin aktivləri 3% azalaraq 136 milyon 447 min manata düşüb.

Ötən il "AzRe Təkrarsığorta" banklardakı depozitlərini azaldıb, dövlət qiymətli kağızlarına sərmayələrini isə artırıb.

"AzRe Təkrarsığorta" şirkəti - "Azər-Türk Bank"ın səhmlərinin 6,55%-nə nəzarət etməklə yanaşı, "Qala Həyat Sığorta" şirkətinin 91,11%-lik, "Qala Sığorta" şirkətinin isə 100%-lik səhmdarıdır.