Regionlar

Salyanda dəyəri 1 milyon 646 min manat olan 20 layihə - İCRA EDİLİR

Salyanda dəyəri 1 milyon 646 min manat olan 20 layihə - İCRA EDİLİR | FED.az
13:14 7 Avq 2019

Bu ilin altı ayında Salyanda iqtisadiyyatın bütün sahələrində uğurlar qazanılıb, sənaye və kənd təsərrüfatının inkişafı davam etdirilib, abadlıq, quruculuq və tikinti işləri sürətləndirilib. İnvestorlarla aparılmış görüşlər, sahibkarlığın inkişafı üçün yaradılmış münbit şərait nəticəsində rayonda özəl investisiya hesabına ümumi dəyəri 1 milyon 646 min manat olan kənd təsərrüfatı, sənaye, iaşə və emal istehsal sahələri üzrə 20 layihənin icrası davam etdirilib. Artıq bir çox sahələr üzrə işlər başa çatdırılıb. Layihələrin həyata keçirilməsi 917 yeni iş yerlərinin yaradılmasına imkan verəcək.

FED.az xəbər verir ki, bu barədə Salyanda yarım ilin yekunları və qarşıda duran vəzifələrə həsr olunan hesabat yığıncağında rayon icra hakimiyyətinin başçısı Sevindik Hətəmov danışıb.
Eləcə də bax:Samuxda 200-dən çox müasir istixana - FƏALİYYƏT GÖSTƏRİR

Yığıncaqda qeyd olunub ki, 6 ay ərzində rayonda yol infrastrukturunun yaxşılaşdırılması istiqamətində mühüm tədbirlər həyata keçirilib. Şirvan-Salyan avtomobil yolunun 21,5 kilometr hissəsinə asfalt örtüyü döşənərək işlər başa çatdırılıb, Azərbaycan Respublikası Prezidentinin Sərəncamı ilə ayrılan vəsait hesabına inşa edilən 11 min nəfər əhalinin yaşadığı, 4 yaşayış məntəqəsini birləşdirən Abadkənd–Kolanı–Xələc–Yenikənd avtomobil yolunun tikintisi isə yekunlaşmaq üzrədir.

Hesabat dövründə şəhərin Taleh Davudzadə küçəsində 3 və 4 nömrəli kommunal binaların 1740 kvadratmetr sahəsi olan köhnə dam örtüyü sökülərək əsaslı təmir olunub, vətəndaşların küçədə rahat gediş-gəlişinin təmin edilməsi məqsədilə şəhər küçələrində piyada səkilərində əsaslı təmir işlərinə başlanılıb. Artıq şəhərin Əli Zeynalov, Yunis Zərgərli, Mir Bağır Ağazadə və Ənvər Qasımzadə küçələrində piyada səkilərində təmir işləri başa çatdırılıb.

Ötən dövrdə rayonun iki yaşayış massivində - Qarabağlı kəndində və Salyan şəhərinin Babazanlı yaşayış sahəsində inşa edilən 100 və 60 yerlik uşaq bağçası-körpələr evinin tikintisi aparılıb, Ərəbqardaşbəyli kənd tam orta məktəbi üçün 180 şagird yerlik yeni məktəb binasının tikintisinə başlanılıb.

Qeyd olunub ki, ötən il rayonda qeyri-neft sektorunun, o cümlədən kənd təsərrüfatının inkişaf etdirilməsi, yeni istehsal sahələrinin yaradılması istiqamətində də mühüm tədbirlər həyata keçirilib.

Ötən dövrdə Qızılağac kəndi ərazisində 3 min hektar sahədə yaradılan aqroparkda işlər davam etdirilib. Aqroparkda mənbəyi Akkuşa suvarma kanalı olmaqla, ümumi uzunluğu 25 kilometr su kanalı çəkilib, ərazidə olan mövcud kollektor-drenaj şəbəkəsinin 50 kilometrlik hissəsi lildən təmizlənib, 25 kilometr uzunluğunda su kanalı, 15 kilometr uzunluğunda elektrik və 1 kilometr qaz xətləri çəkilib. Həmçinin parkda 500 başlıq 4 tövlə, texnika parkı, ofis binası və qonaq evi, 1500 tonluq taxıl anbarı, gücü saatda 10 ton olan 1 ədəd yem zavodu və 4500 tonluq yem anbarı tikilib. Yarım ildə əkin aparılmış 1860 hektar arpa sahəsinin hər hektarından 34,9 sentner məhsul götürülüb, 70 hektar qarğıdalı, 10 hektar bostan, 400 hektar yonca, 101,3 hektar sarımsaq əkini aparılıb, 24 hektar sahədə isə meyvə bağı salınıb. Hazırda sahələrdə məhsul yığımı aparılır.

Cari ilin məhsulu üçün rayonda 6 min 817 hektar sahədə buğda, 9 min 917 hektarda arpa əkilib, buğda sahələrindən 27 min 629 ton, arpa sahələrindən isə 35 min 879 ton məhsul götürülüb. Buğda sahələrinin hər hektarının məhsuldarlığı 40,5, arpa sahələrində isə 36,2 sentner olub. Erkən yazda məhsul istehsalçıları tərəfindən 5097 hektar sahədə təzə yonca, 2681,78 hektar sahədə kartof, tərəvəz və bostan bitkiləri, 761,3 sahədə isə dənli və dənli paxlalı bitkilərin əkini aparılıb.

Yığıncaqda vurğulanıb ki, ötən dövrdə rayonda iribuynuzlu heyvanların sayı 63 min 383, qoyun və keçilərin sayı isə 186 min 736 başa çatıb. Ət istehsalı 46 min 543 ton (diri çəkidə), süd istehsalı 24 min 576 ton, yun istehsalı 347,6 ton və yumurta istehsalı 17 milyon 101 min ədəd olub.

İclasda rayonda əhalinin elektrik enerjisi, təbii qaz və su ilə təmin edilməsi sahəsində görülən işlərdən ətraflı söhbət açılıb, təhsil, səhiyyə, mədəniyyət sahəsində qazanılan nailiyyətlər və nöqsanlar göstərilib.

Sonda müzakirə olunan məsələyə dair qərar qəbul edilib.

Digər xəbərlər