Azərbaycanda əmlak sektorunun canlanması və sənədləşməyə marağın artması əhalinin bununla bağlı müraciətlərinə də təsirini göstərib.
 
Əmlak Məsələləri Dövlət Komitəsi (ƏMDK) avqust ayında ölkə əhalisinin komitənin 193 Vahid Çağrı mərkəzinə müraciətlərini açıqlayıb. Komitədən bildirilir ki, bu xidmət vasitəsilə istənilən vətəndaş komitənin fəaliyyətilə bağlı bütün suallara cavab tapmaqla yanaşı, hüquqi məsləhətlər də ala bilir. Xüsusilə dövlət əmlakının özəlləşdirilməsi, hərracların keçirilməsi, daşınmaz əmlakın qeydiyyatı, kadastr uçotu işləri və digər müraciətlərə mütəxəssislər  tərəfindən həssaslıqla yanaşılır.
 
Ölkə vətəndaşları bu üstünlükləri hiss etdiyindən komitəyə müraciətlər artmaqdadır Təkcə avqust ayı ərzində komitənin Çağrı mərkəzinə ümumilikdə 700-dən çox müraciət daxil olub. Müraciətlərin 260-a yaxını daşınmaz əmlakın qeydiyyatı ilə bağlı, digərləri isə əsasən, özəlləşmə, kadastr işləri, dövlət rüsumu və xidmət haqqı ilə bağlı müraciətlərdir. Vətəndaşların ünvanladığı 570-ə yaxın sorğu tipli müraciət komitənin əməkdaşları tərəfindən qanunvericiliyə uyğun olaraq dərhal cavablandırılıb. 150-dən aşağı araşdırılma tələb edən müraciət isə qeydə alınaraq, müvafiq struktur bölmələrə göndərilib.
 
Daxil olan müraciətlərin bölgələr üzrə dinamikasına baxsaq, ötən ay digər şəhər və rayonlara nisbətdə paytaxt əhalisi tərəfindən mərkəzə daha çox müraciət daxil olub. Belə ki, müraciətlərin 550-dən çoxu Bakı şəhərinin sakinləri tərəfindən ünvanlanıb. Regionlar üzrə alınan nəticəyə uyğun olaraq komitə maarifləndirmə işlərini intensiv formada davam etdirir.
 
Komitə tərəfindən reallaşan sosial əhəmiyyətli layihələrə olan ictimai maraq Çağrı mərkəzinə edilən müraciətlərdə də öz əksini tapıb. Belə ki, xidmətlərin səyyar formada “Kütləvi çıxarış” və “Əmlakını qeydiyyata al və mülkiyyətinə sahib ol” kampaniyaları ilə ünvanlarda göstərilməsi sakinləri əmlaklarını qeydiyyata almağa həvəsləndirir.
 
Qeyd edək ki, müraciət etmək istəyən vətəndaşlar üçün Çağrı mərkəzi canlı və səsli menyu rejimində xidmət göstərir. Çağrı mərkəzi tərəfindən göstərilən bütün xidmətlər və stasionar nömrələrdən 193 nömrəsinə edilən zənglər ödənişsizdir. Canlı rejim həftənin iş günləri fasiləsiz olaraq saat 09:00-dan 18:00-dək fəaliyyət göstərir.