"Cənab prezident diaspora işi ilə bağlı çox ciddi tapşırıqlar verib. Mütləq qaydada kadr dəyişiklikləri olacaq". FED.az xəbər verir ki, bunu Diasporla İş üzrə Dövlət Komitəsinin sədri Fuad Muradov deyib.
O bildirib ki, bu istiqamətdə ciddi işlər aparılır: «Kadrlar müasir tələblərə cavab verməli, müxtəlif dilləri bilməlidirlər. Şübhəsiz ki, verilən tapşırıqlar yerinə yetiriləcək. Kim yeni tələblərə uyğun olaraq yeni yanaşmaları qəbul edəcəksə, onlar hamısı işlərinə davam edəcəklər».
Komitə sədri bildirib ki, diaspora işi bütün dünyada gücləndiriləcək və bu zaman xaricdəki azərbaycanlı elm adamları və biznesmenlərin imknalarından da istifadə olunacaq: «Bu gün bizim soydaşlarımız yüzdən çox ölkədə məskunlaşıb. Bəlkə də bəzilərimiz bunu düşünmürdük. Elə bir guşə yoxdur ki, azərbaycanlılar orada olmasın. Bizim şüar ondan ibarətdir ki, vətən uzaqda deyil. Çalışmalıyıq ki, bura vətəndaşlarımızı cəlb edək. Onların içində elm adamları, biznesmenlər var. Bu, Azərbaycan üçün çox vacibdir».
F.Muradovun digər maraqlı mesajı komitənin fəaliyyətinin dəyişməsi ilə bağlı olub. Onun sözlərinə görə, Dispora Komitəsi təkcə xaricdə yaşayan azərbaycanlılarla deyil, Azərbaycanda yaşayan xaricilərlə də iş aparacaq: «Çalışırıq ki, komitənin işində yeni istiqamətlər olsun. Diaspor işi tək xaricdə yaşayan azərbaycalılarla deyil, həm də Azərbaycanda yaşayan xaricilərlə bağlı olmalıdır. Bu sahədə ikitərəfli istiqamətlər olmalıdır».
