Süni intellekt bazarında aparıcı şirkət olan «Nvidia»nın səhmləri son bir həftədə 20 faiz artaraq şirkətin bazar kapitallaşmasını 6 trilyon dollara yaxınlaşdırıb.
FED.az xəbər verir ki, ABŞ-da yerləşən texnologiya nəhəngi Nvidia şirkətinin səhmləri cümə axşamı günü süni intellekt investisiyalarının artmasından mənfəət əldə etmək istəyən investorların çip istehsalçısına müraciət etməsi ilə yüksəliş tendensiyasını davam etdirib.
Səhmlər gün ərzində 4,7% artaraq 236,47 dollara çatıb. Bu artım şirkətin bazar kapitallaşmasına 900 milyard dollardan çox əlavə edərək ümumi bazar dəyərini 6 trilyon dollara yaxınlaşdırıb. Bu vəziyyyt Nvidia-nın dəyərini indiyədək heç bir şirkətin çata bilmədiyi bir səviyyəyə qaldırır.
Şirkət dəyərinin artması ilə «Nvidia» artıq digər şirkətlərlə deyil, daha qlobal aktivlərlə rəqabətə daxil olub, belə ki, şirkətin səhmləri qızıldan sonra dünyanın ikinci ən böyük aktivinə çevrilib.
Səhmlərin sonuncu artımı süni intellekt sahəsində liderlik edən şirkətlərə investorların güclü marağını göstərir. «Nvidia»nın rəhbəri Jensen Huang isə bu həftə ABŞ prezidenti Donald Trampla Çinə səfər edib.
