Amerikada çərşənbə günü açıqlanan pərakəndə satış dövriyyəsinin həcminə dair statistik məlumatlar, investorlar tərəfindən ABŞ Federal Ehtiyatlar Sisteminə (FED) faiz dərəcələrini yüksəltmək üçün əlverişli zəmin yarada biləcək dayanıqlı bir iqtisadiyyatın mövcudluğuna işarə olaraq qəbul edildiyinə görə dollar indeksinin major valyutalar qarşısında yenidən bahalaşmasına dəstək oldu.
Birjada necə qazanırlar? - 2023-cü ildə investorlar üçün – «İNVESTAZ»DAN PROQNOZLAR
Həmçinin İngiltərədə dərc olunan inflyasiya göstəriciləri də funt-sterlinqin və avronun dollar qarşısında ucuzlaşmasına səbəb oldu.
Dünən 103.80 hədlərinə yüksələn dollar daha sonra 103.35 hədlərinə gerilədi. “Buğa"lar DXY-ın qiymətini 103.50 bənd həddinin üzərinə qaldıra və orada saxlaya bilsələr, EUR/USD, GBP/USD məzənnələrində eniş tendensiyası daha kəskin xarakter ala bilər.
Bu gün Bakı vaxtı ilə saat 17:30-da Amerikada açıqlanacaq istehsal qiymətləri indeksi, tikinti üzrə icazələrin sayı, eləcə də, Filadelfiya FED-dən emalat indeksi kimi önəmli iqtisadi göstəricilər investorların diqqət mərkəzində olacaq.
Dolların bahalaşması fonunda qızıl ucuzlaşmaqda davam edir. Hazırda 1840$-dan təklif olunan qiymətli metalın bir unsiya üzrə qiyməti 1850$ səviyyəsinin altında qaldığı müddətcə,1800$-a kimi ucuzlaşa bilər.
Kriptovalyuta birjalarının lokomativi olan bitkoin dünən gün ərzində 22 000$-ın üzərində dəstək görərək təqribən 11% dəyər qazanıb. Hazırda 24700$-ın üzərində ticarət edilən BTC/USD 25000$ müqavimətini qırsa, 27000$-a kimi bahalaşa bilər.
Təhlil “İnvest-AZ İnvestisiya Şirkəti” QSC-nin Analitika Departamenti tərəfindən hazırlanıb.
