Bu gün açıqlanacaq və ABŞ Federal Ehtiyatlar Sisteminin (FED) monetar siyasətinin gedişatı üçün əhəmiyyətli olan ABŞ-da əmək bazarına dair statistik göstəricilər öncəsi dollar indeksinin 105.50 bənd hədlərindən 104.80 bənd hədlərinə kimi gerilədiyi müşahidə olunur.
Birjada necə qazanırlar? - 2023-cü ildə investorlar üçün – «İNVESTAZ»DAN PROQNOZLAR
Bunda dünən Amerikada işsizlik müavinatı üçün müraciətlərin sayının artımla açıqlanması da mühim rol oynamışdır. Dərc olunan məlumatlara görə, işsizlik müavinəti üçün müraciətlər gözləniləndən çox artıb. 2023-cü ildə ilk dəfə işsizlik müavinəti üçün müraciət edənlərin sayı 4 Martda bitən həftədə əvvəlki həftəyə nisbətən 21 min nəfər artaraq 211 min nəfərlə 2022-ci ilin dekabrından bəri ən yüksək səviyyədir.
FED sədri Jerom Pavelin mart ayı toplantısı ilə bağlı qərar verilmədiyi, açıqlanacaq məlumatların təhlil ediləcəyi və faiz qərarında əmək bazarına dair göstəricilərin, xüsusilə də “NFP”-nin əhəmiyyətli olduğunu vurğulamasından sonra analitiklər fevral ayı məşğulluq hesabatının bazarların diqqət mərkəzində olduğunu qeyd ediblər.
Qeyd edək ki, analitiklər fevral ayında qeyri-kənd təsərrüfatı sektorunda 205 yeni iş yeri açılacağı, işsizlik səviyyəsinin isə 3.4% səviyyəsində qalacağını proqnozlaşdırırlar.
Həmçinin bu gün İngiltərədə açıqlanacaq ÜDM və Sənaye istehsalının həcmi, Almaniyada dərc olunacaq İstehlak Qiymətləri İndeksi kimi vacib iqtisadi göstəricilər, eləcə də Avropa Mərkəzi Bankının sədri Kristin Laqardın çıxışı investorların diqqət mərkəzində olacaq.
Təhlillərə əsasən dollar indeksində artım tendensiyası davam edər və yenidən 105 bənd hədləri üzərinə yüksələrsə, EUR/USD və GBP/USD məzənnələri müvafiq olaraq 1.05$ və 1.17$-a kimi ucuzlaşa bilər.
Dollar indeksindəki geriləmə fonunda qızıl dəyər 1835$-a kimi bahalaşdı. Hazırda 1828$-dan təklif edilən qiymətli metalın bir unsiya üzrə dəyəri 1824$-ın altına düşsə, 1814$ və 1806$-a kimi ucuzlaşa bilər.
Məlumat “İnvest-AZ İnvestisiya Şirkəti” QSC-nin Analitika Departamenti tərəfindən hazırlanıb.
