30 iyun 2025-ci il tarixinə “Accessbank”ın müştərilərə verdiyi kreditlərin ümumi həcmi 1 milyard 224 milyon 625 min manat təşkil edib.
FED.az bu barədə bankın rüblük hesabatına istinadən xəbər verir.
Bu, 2024-cü ilin sonu ilə müqayisədə 73 milyon 75 min manat və ya 6,3% artım deməkdir.
Kredit portfelinin əsas hissəsini – 940 milyon 428 min manatını biznes kreditləri təşkil edib. İlin əvvəlindən biznes kreditləri 38 milyon 548 min manat və ya 4,3% artıb.
Hesabat dövründə bankın istehlak kreditləri portfeli 26 milyon 819 min manat və ya 11,2% artaraq 265 milyon 961 min manata çatıb. Ən kəskin artım isə daşınmaz əmlak kreditlərində qeydə alınıb. Bu istiqamətdə portfel 7 milyon 708 min manat və ya 73,2% artaraq 18 milyon 236 min manat olub.
Mümkün zərərlər üçün yaradılmış məqsədli ehtiyatların həcmi 54 milyon 610 min manat təşkil edib. Nəticədə bankın xalis kredit portfeli 1 milyard 170 milyon 15 min manata bərabər olub ki, bu da ilin əvvəli ilə müqayisədə 67 milyon 431 min manat və ya 6,1% artım deməkdir.
Xatırladaq ki, 31 dekabr 2024-cü il tarixində bankın ümumi kredit portfeli 1 milyard 151 milyon 550 min manat, xalis kredit portfeli isə 1 milyard 102 milyon 584 min manat olmuşdu.
