Pambıq istehsalı, emalı və satışı ilə məşğul olan Azərbaycanın “P-Aqro” şirkətinin ixracı kəskin artıb.
FED.az xəbər verir ki, İqtisadi İslahatların Təhlili və Kommunikasiya Mərkəzinin “İxrac İcmalı”nın 2019-ci ilin avqust sayına istinadən xəbər verir ki, bu ilin yanvar-iyul aylarında “P-Aqro” MMC cəmi ixracı 17,8 milyon dollar təşkil edib. Bu, ötən ilin eyni dövrü ilə müqayisədə 77,5 dəfə çoxdur. Ötən ilin 7 ayında şirkətin ixracının həcmi 213 min dollar təşkil etmişdi.
Azərbaycanın başqa bir pambıq şirkəti "MKT İstehsalat Kommersiya" MMC-nin cari ilin 7 ayında ixracının məbləği 45,1 milyon dollar təşkil edib. Şirkətin ixracı ötən ilin eyni dövrü ilə müqayisədə 19% artıb. 2018-ci ilin yanvar-iyul aylarında "MKT İstehsalat Kommersiya"nın ixracının məbləği 37,9 milyon dollar təşkil etmişdı.
Məlumat üçün bildirək ki, “P-Aqro” MMC tabeliyində 17 filial, Saatlı və Ucar rayonlarında yerləşən 2 pambıq emalı zavodları fəaliyyət göstərir. Saatlı Pambıq Emalı Zavodu illik 20 000 ton xam-pambıq və Ucar Pambıq Emalı Zavodu isə illik 40 000 ton xam-pambıq emal etmək gücünə malikdir. “P-Aqro” MMC tərəfindən 2018-ci ildə 24 min hektar torpaq sahəsində pambıq əkilmiş, 36 min tondan çox xam pambıq tədarük edilmişdir. 2019-cu il mövsümündə 19000 ha əkinə yararlı və suvarılan torpaq sahələrində pambıq əkilməsi planlaşdırılmışdı.
“MKT İstehsalat Kommersiya” MMC Azərbaycanın pambıq və pambıq məhsulları istehsalı və satışı ilə məşğul olan aparıcı şirkətidir. 1995-ci ildən fəaliyyətə başlayan Cəmiyyət ölkənin pambıqçılıqla məşğul olan qabaqcıl rayonlarında (Ağcabədi, Ağdam, Ağdaş, Biləsuvar, Beyləqan, Bərdə, Neftçala, Saatlı, Sabirabad, Salyan, Kürdəmir, Tərtər, Goranboy, İmişli, Ucar, Yevlax, Zərdab) yeni pambıq sortlarının əkilməsi, məhsuldarlığın artması, əlverişli infrastrukturun yaradılması istiqamətində işlər aparmaqda davam edir.
Marja.az
