Fevral ayının 26-da “Qala Həyat” və “Qala Sığorta” şirkətinin əməkdaşları Xocalı soyqırımının 26-cı ildönümü ilə əlaqədar soyqırım qurbanlarının xatirəsinə ucaldılan “Ana harayı” abidəsini ziyarət ediblər.
Hər iki şirkətin əməkdaşları tərəfindən Xocalıda şəhid olan həmvətənlərimizin xatirəsinə ucaldılan abidənin önünə gül dəstələri qoyulub. Soyqırım qurbanlarının ruhuna dualar oxunub.
Xatırladaq ki, 1992-ci il fevralın 25-dən 26-na keçən gecə baş verən Xocalı soyqırımı bəşər tarixində ən qanlı faciələrdən biridir. Bu faciədən 26 il keçir. Həmin kütləvi qırğın nəticəsində 106-sı qadın, 63-ü uşaq, 70-i qoca olmaqla 613 nəfər amansızlıqla qətlə yetirildi, 487 nəfər şikəst oldu, 1275 dinc sakin girov götürüldü, onlardan 150 nəfərin taleyi hələ də məlum deyil. Bu soyqırımı aktı nəticəsində 8 ailə tamamilə məhv edildi, 25 uşaq hər iki valideynini itirdi.
Hər il dünya azərbaycanlıları və ədaləti uca tutanlar Xocalı soyqırımı qurbanlarının xatirəsini yad edirlər.
“Qala Həyat” və “Qala Sığorta”nın əməkdaşları “Ana harayı” abidəsini ziyarət edib
16:43
26 Fev 2018
