“Gəncə – Qənnadı” ATSC 2017-ci ili 83 min 637 min manat zərər ilə başa vurub. Şirkət 2016-cı ili 87 min 441 manat zərər ilə bağlamışdı.
FED.az ATSC-nin maliyyə hesabatına istinadən xəbər verir ki, ötən il “Gəncə – Qənnadı”nın əməliyyat gəliri 2016-cı ildəki 14 min 268 manatdan 17 min 734 manata yüksəlib. Eyni zamanda, 1763 manat sair əməliyyat gəliri əldə olunub. Cəmi 19 min 498 manat gəlirlərə qarşı, ötən il şirkətin xərcləri isə 103 min 136 manat təşkil edib. Xərclər gəlirləri üstələdiyindən 83 min 637 min manat zərər yaranıb.
31 Dekabr 2017-ci il tarixində “Gəncə – Qənnadı” 7 milyon 127 min manat cəmi aktivlərə, 5 milyon 288 min manat cəmi kapitala və 1 milyon 839 min manat cəmi öhdəliklərə malik olub.
İqtisadiyyat Nazirliyinin Sənaye Portalında verilən məlumata görə, “Gəncə Qənnadı” Açıq Səhmdar Cəmiyyəti pomadalı konfetlər, vafli əsaslı şokoladlı konfetlər, vaflilər, peçenye, pryanik, karamel, marmelad, “Çinar” konfetləri və s. istehsal edir. “Gəncə Qənnadı” ASC-də istehsal edilən qənnadı məhsulları Türkiyə və Almaniyanın “Nagema” şirkətlərinin istehsalı olan avadanlıqlar vasitəsilə emal olunur. Müəssisəsnin məhsulları Gürcüstan və Rusiyaya ixrac olunur. Müəssisədə çalışan işçilərin sayı 180 nəfərdir.
180 nəfər işçisi olan və məhsullarını xaricə ixrac edən bir müəssisənin 20 min manatdan az əməliyyat gəliri əldə etməsi inandırıcı deyil.
Bir vaxtlar "Çinar” şokoladlarının şöhrəti bütün SSRİ-ni bürümüşdü. Bu məşhur Azərbaycan brendi "Gəncə-Qənnadı” fabrikinə məxsusdur.
