“Azerbaijan International Mining Company Limited” (AIMC - Böyük Britaniyanın qızıl mədən şirkəti olan “Anglo-Asian Mining”in (AAM) törəmə şirkəti) ali rəhbərlik komandasını gücləndirmək məqsədilə bir sıra təyinatlar həyata keçirib.
FED.az bu barədə AAM şirkətinə istinadən xəbər verir.
Məlumata görə, Dominik O'Hara AIMC-nin dağ-mədən işləri üzrə direktoru vəzifəsinə təyin edilib. D.O'Hara üç qitədə 15 ildən çox müddətdə mis və qızıl hasilatı üzrə açıq və yeraltı işlərdə çalışıb. Bu vəzifəyə təyin olunmazdan əvvəl o, konsaltinq sahəsində çalışıb, həmçinin “Glencore” və “AngloGold Ashanti” şirkətlərində rəhbər vəzifələr tutub.
AMIC-nin geologiya üzrə direktoru vəzifəsinə dağ-mədən sənayesində 13 illik təcrübəyə malik Şon Lafem təyin edilib. Yeni vəzifəsində o, şirkətin mineral resursları və hasilat geologiyası ilə bağlı bütün geoloji aspektlərə nəzarət edəcək. Hazırkı təyinatından əvvəl Ş.Lafem SLR, “Mining Plus”, “Lagata Private Equity” və “Glencore Copper” şirkətlərində baş geoloq vəzifələrində çalışıb.
AIMC-nin planlaşdırma üzrə baş mədən mühəndisi vəzifəsinə isə Sergey Reznik təyin edilib. O, Şimali Amerika, Avropa, Mərkəzi Asiya və Yaxın Şərqdə açıq və yeraltı mədənlərdə 15 ildən çox iş təcrübəsinə malikdir. Yeni vəzifəsində S.Reznik, mövcud əməliyyatlara və genişlənən layihə portfelinə dəstək göstərəcək.
Əfqan İmamlı və Fuad Sulxayev mədən idarəedicisi vəzifələrinə təyin ediliblər. Onlar “Dəmirli” və “Gədəbəy” yataqlarının açıq şəkildə işlənməsinə cavabdeh olacaqlar. Bu da ali rəhbərliyin gündəlik nəzarətinə ehtiyacı azaldacaq.
"Bu təyinatlar AAM-ın orta səviyyəli çoxprofilli mis istehsalçısına çevrilməsinə yönəlmiş ortamüddətli artım strategiyasının həyata keçirilməsində əsas rol oynayır. Onlar icraçı komandanı dəstəkləyir, eləcə də onun idarəetmə potensialını və səriştəliliyini gücləndirir", - məlumatda bildirilib.
Xatırladaq ki, hazırda “Anglo Asian Mining” “Gədəbəy” və “Qoşa” müqavilə sahələrindən qiymətli metal hasil edir. 1997-ci il avqust ayının 21-də imzalanan “Production Sharing Agreement” (PSA) tipli müqavilə 6 yatağın işlənməsini nəzərdə tutub. Müqavilədə Azərbaycanın payı 51 %, “Anglo Asian Mining PLC” şirkətinin payı 49 % təşkil edir. Hazırda şirkət Azərbaycanda 8 müqavilə sahəsini işləmək hüququna malikdir.
