Banner
Banner

Qarabağ

Rusiya «dişlərini göstərməyə başlayıb»: XİN-dən sonra Xarici Kəşfiyyat da «Suriyalı muzdlular»dan danışır

Rusiya «dişlərini göstərməyə başlayıb»: XİN-dən sonra Xarici Kəşfiyyat da «Suriyalı muzdlular»dan danışır | FED.az
12:47 6 Noy 2020

Rusiyanın dövlət qurumları bir-birinin ardınca Qarabağda guya Suriyalı muzdluların vuruşması barədə açıqlamalar verməyə başlayıblar.

Eləcə də bax: «Biz 10 milyonuq, suriyalılara ehtiyacımız yoxdur»

FED.az xəbər verir ki, dünən, noyabrın 5-də Rusiya xarici işlər nazirliyinin sözçüsü Mariya Zaxarova bildirmişdi ki, Moskva Yaxın Şərqdəki terrorçuların Qarabağdakı döyüş əməliyyatlarına cəlb edilməsindən narahatdır. Onnu sözlərinə görə, Rusiya tərəfi guya məlumat alıb ki, Qarabağa terrorçu təşkilatların nümayəndələri Qarabağa toplanılır. 

«Bu vəziyyət bizdə ciddi narahatlıq doğurmaya bilməz, çünki hadisələrin belə inkişafı Zaqafqaziyada yeni terrorçu anklavının yaranmasına səbəb ola bilər».

Xarici işlər nazirliyindən sonra Rusiyanın xarici kəşfiyyatının direktoru Sergey Narışkin də Qarabağda guya «suriyalı muzdluların» olduğunu bildirib. «Xarici kəşfiyyat xidməti Qarababdakı suriyalı döyüşçülər barədə dəqiq məlumatları Yaxın və Orta Şərq ölkələrinin tərəfdaş xidmətlərindən alıb. Biz bu məlumatları müxtəlif mənbələrdən alırıq» - deyə Narışkin bildirib.

Xidmət rəhbərinin bu açıqlamasında məlumatın haradan alındığı, onun dəqiq mənbəyi və onunla bağlı hər hansı sübut göstərilmir.

Xatırlatmaq yerinə düşər ki, XİN-in «muzdlular» barədə açıqlamasından bir neçə dəqiqə əvvəl isə Rusiya tərəfi, elə Mariya Zaxarovanın dili ilə  Qarabağda döyüşlərin dayandırılmasına, tərəfləri danışıqlara başlamağa çağırmışdı.

Başqa sözlə, rəsmi Moskva Qarabağ münaqişəsinin həlli ilə bağlı prosesdə yenidən təşəbbüsü ələ almağa çalışır. «Suriyalı muzdlular»la bağlı mətbuata sızdırılan, guya məxfi mənbələrdən alınan və sübuta yetirilə bilməyən informasiya tullantıları isə Azərbaycana təzyiq etmək məqsədi daşıyır.

Yeri gəlmişkən, rəsmi Bakı bu iddialara bir neçə dəfə cavab verib. Dünən prezident İlham Əliyev İspaniyanın EFE agentliyinə müsahibəsində bildirib ki, belə əsassız ittihamlara dəfələrlə cavab verib:

«Səmimi desəm, təəssüflənirəm ki, bitərəf olmalı, onlara ATƏT tərəfindən verilmiş mandata əsasən hərəkət etməli olan ölkələrin yüksək səviyyəli rəsmiləri təsdiqini tapmamış bu əsassız dırnaqarası “informasiya”dan və şayiələrdən istifadə edirlər. Bu, birincisi.

İkincisi, bizdə heç bir muzdlu yoxdur. Mən bu haqda dəfələrlə demişəm. Bizim onlara ehtiyacımız yoxdur. Bizim 100 min döyüşçüdən ibarət ordumuz var, biz tam səfərbərlik elan etsək, bundan bir neçə dəfə çox toplaya bilərik. Lakin biz Ermənistandan fərqli olaraq bunu etmirik. Bizim tərəfimizdə hər hansı bir əcnəbi döyüşçünün vuruşması ilə bağlı heç bir sübut yoxdur. Bu bir aydan çox müddət ərzində bizə heç bir sübut, heç bir sənəd, heç bir dəlil təqdim edilməmişdir. Yalnız bəyanatlar.

Bəs, onda nə üçün onlar Ermənistan tərəfində baş verənləri, Ermənistan tərəfindən neçə muzdlunun döyüşdüyünü görmürlər? Nə üçün bizi ittiham etməyə çalışan nə Rusiya, nə də Fransa bunun haqqında heç nə deməyib? Bizdə artıq əcnəbi pasportları olan zərərsizləşdirilmiş insanların siyahısı var. Amerikalı, fransalı, kanadalı, livanlı, iraqlı, postsovet məkanı ölkələrindən, onlarla Gürcüstandandır. Bəli, onlar o ölkələrdə yaşayan ermənilərdir, lakin bu, heç bir fərq etmir. Əgər onlar başqa ölkələrin vətəndaşlarıdırsa, onların orada olması qanunsuz hesab edilir.

Bu vaxtadək bu məsələ barədə heç nə deyilməmişdir, amma bizim sübutlarımız var. Bizim əlimizdə pasportlar var. Bizim sübutumuz var, video var. Bunun haqqında heç nə deyilməyib. Bu, bizim tərəfimizdən qəbul edilə bilməyən selektiv bir yanaşmadır, bu, vasitəçilərin mandatına uyğun deyil. Mən dəfələrlə demişəm, vasitəçilər bitərəf olmalıdırlar. Əgər onlar tərəf tuturlarsa, bu, onların işidir, lakin onda vasitəçilikdən çıxmalıdırlar.

Hər bir ölkənin istənilən ölkəyə yaxşı və ya pis münasibəti ola bilər. Biz müəyyən səbəblər üzündən bəzi ölkələr tərəfindən ermənilərə qarşı xüsusi hisslərin olduğunu başa düşürük. Bunu öz ölkələrinin adından deyirlərsə, biz buna etiraz etmirik. Lakin əgər siz vasitəçisinizsə, xahiş edirəm, bitərəf olun və ittihamlardan uzaq durun. Əgər biz bizi muzdlularla bağlı ittiham edənləri dünyanın müxtəlif yerlərində nə etdikləri haqqında ittiham etməyə başlasaq, bu, çox uzun bir məsələ olacaq. Biz bunu etmirik. Buna görə biz tərəfdaşlarımızdan eynisini gözləyirik».

Banner

Digər xəbərlər