Azərbaycanın səfalı təbiəti qoynunda, Qubada dağların ətəyində, beşulduzlu “Quba Rixos” hoteli rebrendinq etdi. 2018-ci il aprelin 1-dən otel “Quba Palace” adı ilə öz qonaqlarını qəbul edəcək.
Hoteldən FED.az-a verilən məlumata görə, hazırda Azərbaycanda hotel menecmentliyi sahəsində ən peşəkar kadrları öz ətrafında cəmləşdirən “Quba Palace” eyni komanda ilə yeni brend altında fəaliyyətini davam etdirəcək.
Hotelin Baş Meneceri Kənan Ağayevin sözlərinə görə, Azərbaycanın regionlarında ən böyük və ən populyar otel olmaqla “Quba Palace”, yüksək səviyyəli xidməti ilə sektorda uğurlu və peşəkar imicini saxlayaraq yeni brendini daha da məşhurlaşdırmağa çalışacaq.
Hotel rəhbərliyi Rixos brendinin otelin adından çıxarılmasının yeni çağırışlarla əlaqəli olduğunu bildirib. Belə ki, Rixos brendi regionu tərk etmək haqqında qərarını açıqlayaraq rəsmən həm Azərbaycan, həm də Gürcüstan bazarından çıxır. Nəticə etibarilə aprel ayından Azərbaycandakı “Quba Rixos” oteli “Quba Palace”, Gürcüstandakı “Rixos Borjomi” isə “Borjomi Likani” adını daşıyacaq.
“Biz daha çox turist cəlb etmək, otelimizin böyük potensial və imkanlarından səmərəli şəkildə istifadə etmək istəyirik. Əminik ki, yaxın bir müddətdə “Quba Palace” bazarda daha güclü bir brend kimi tanınacaq”, deyə Kənan Ağayev bildirib.
Qeyd edək ki, Azərbaycanda ilk və yeganə qolf meydançasına malik “Quba Palace” hotel kompleksi 2013-cü ildə istifadəyə verilib. Quba rayonunun Əski İqrığ kəndində yerləşən kompleks yeddimərtəbəli əsas binadan, 26 villadan, üç restoran və bir gecə klubundan, əyləncə parkından, qolf sahəsindən və digər müasir xidmət obyektlərindən ibarət olmaqla 127 hektar ərazini əhatə edir. Ərazidə ümumi sahəsi 30 min kvadratmetr olan süni göl, helikopterlərin enməsi üçün meydança və digər yardımçı binalar da mövcuddur.
Hotel barədə əlavə məlumat üçün: www.qubapalace.com və (+99412) 404 3434 / +99450 281 8150 nömrələri ilə əlaqə saxlaya bilərsiniz.
“Quba Rixos” yeni adla fəaliyyət göstərəcək
10:57
2 Aprel 2018
