Türkiyə Mərkəzi Bankı (TCMB) faiz qərarlarını açıqlayıb.

FED.az xəbər verir ki,TCMB borcvermə faizini (Likvidlik pəncərəsi - GLP) 12,75%-dən 13,50%-ə qaldırıb.

Qərardan sonra Türk lirəsi Dollar qarşısnda bahalaşıb. Bakı vaxtı ilə saat 15:03-də Dollar/TL məzənnəsi 4.0350 səviyyələrinədək geriləyib. Sonradan məzənnə bir qədər yüksəlib.

Eləcə də bax: "Azərbaycan və Türkiyə iqtisadi sahədə milli valyutalara keçəcək"

TCMB siyasət faizini (uçot dərəcəsi) 8%-də, gecəlik marginal maliyyələşmə nisbətini 9,25%-də və gecəlik borc faizini 7,25%-də sabit saxlayıb.

 Mərkəzi Bank inflyasiya və inflyasiya gözləntilərinin olduğu yüksək səviyyələrin risk yaratmağa davam etdiyini qeyd edib. "İdxal qiymətlərindəki yüksəliş sözügedən riskləri artırmışdır" -ifadəsi istifadə edilib.

SƏRT PUL SİYASƏTİNƏ KEÇİR

Açıqlamada bu ifadələrə yer verilib; "Bu çərçivədə İdarə Heyəti, qiymət sabitliyini (inflyasiyanı) dəstəkləmək məqsədilə sərt pul siyasətinə keçilməsinə qərar vermişdir".

Mərkəz Bank əsas məqsədi olan qiymət sabitliyi (inflyasiya) üçün əlindəki bütün vasitələrdən istifadə etməyə davam edəcəkdir. 

İnflyasiyada yaxşılaşma təmin olunana qədər pul siyasətində sərt mövqe qətiyyətlə davam etdiriləcəkdir.

İnflyasiya və inflyasiyaya təsir edən digər faktorlarda proseslər yaxından izlənəcək, ehtiyac duyulması halında əlavə sərt qərarlar verilə bilər.

Likvidlik Pəncərəsi (GLP) - Türkiyə Respublikası Mərkəzi Bankının (TCMB) son borc verən məqam kimi, gün sonu ödəmə sistemlərində yarana biləcək problemlərin qarşısını almaq məqsədilə banklara verdiyi məhdudiyyətsiz müddətli TL borc imkanıdır.

Azərbaycanda türk lirəsini bir sıra banklardan almaq olar. Belə ki, "Günaybank"da lirənin alış qiyməti 0,36, satış qiyməti isə 0,43 manatdır.