ABŞ Prezidenti Donald Trampın elan etdiyi gömrük rüsumlarının dünya bazarlarının çökməsinə səbəb olmasından sonra dünyanın 500 ən varlı insanının ümumi sərvəti 208 milyard dollar azalıb.
Tramp Azərbaycana da gömrük rüsumu - TƏTBİQ ETDİ
FED.az xəbər verir ki, bu barədə “Bloomberg” agentliyi məlumat yayıb.
“Bloomberg Billionaires Index”in (BBI) məlumatına görə, bu, indeksin 13 illik tarixində dördüncü ən böyük birgünlük çökmə və COVID-19 pandemiyasından bəri irimiqyaslı azalmadır. Qeyd olunub ki, siyahıda olan milyarderlərin yarısından çoxunun sərvəti orta hesabla 3,3 % azalıb.
Hesablamalara görə, ən çox amerikalı milyarderlər, xüsusilə “Meta” korporasiyasının rəhbəri Mark Zukerberq və “Amazon”un təsisçisi Ceff Bezos zərər çəkib. Meksikanın ən varlı insanı olan Karlos Slim ABŞ xaricində tariflərin mənfi təsirinin yan keçdiyi az sayda milyarderlərdən biri olub.
Ən böyük itki ilə Zukerberq üzləşib – “Meta”nın səhmlərinin 9 % ucuzlaşması nəticəsində onun sərvəti 17,9 milyard dollar azalıb. “Amazon”un səhmləri də 9 % dəyər itirib ki, bu da Ceff Bezosun sərvətinin 15,9 milyard dollar azalmasına səbəb olub. “Tesla”nın rəhbəri İlon Mask şirkətin səhmlərinin 5,5 % ucuzlaşmasından sonra 11 milyard dollar itirib.
D.Tramp aprelin 2-də 185 ölkə və ərazidən idxal olunan məhsullara gömrük rüsumları tətbiq edəcəyini elan edib. O, idxal malları üçün minimum 10 % rüsum dərəcəsi müəyyən edəcəyini bildirib. (Report)
