Azərbaycanda benzin, dizel yanacağı, maye qaz, energetik içkilər (alkoqollu və alkoqolsuz) və elektron siqaret üçün maye, tütün məmulatları və alkoqollu içkilərə faktiki yeni vergi tətbiq olunur.
 
ELƏCƏ DƏ BAX: Həmin müəssisələrdə vergidən yayınma riskləri yüksəkdir – NAZİRLİK
 
FED.az-ın məlumatına görə, bu, Milli Məclisə təqdim olunan və sabah plenar iclasda müzakirəyə çıxarılacaq "Tibbi sığorta haqqında" qanuna dəyişikliklər edilməsi barədə qanun layihəsində əksini tapıb.
 
Qanun layihəsinə əsasən, Azərbaycan  ərazisində istehsal edilərək daxili istehlaka yönəldilən (topdan satılan) və Azərbaycan Respublikasının ərazisinə idxal olunan avtomobil benzinin, dizel yanacağının və maye qazın hər litrinə görə 2 qəpik,  energetik içkilərə (alkoqollu və alkoqolsuz) və elektron siqaret üçün mayeyə aksiz markasının verilməsinə görə - verilən hər bir aksiz markasına görə 10 qəpik, tütün məmulatlarına aksiz markasının verilməsinə görə verilən hər bir aksiz markasına görə 5 qəpik, alkoqollu içkilərə aksiz markasının verilməsinə görə  verilən hər bir aksiz markasına görə 10 qəpik icbari tibbi sığorta üzrə sığorta haqları qismində alınacaq.
 
Qanun layihəsinə əsasən, Azərbaycan ərazisində benzininin, dizel yanacağının və maye qazın istehsalı və idxalı ilə məşğul olan vergi ödəyicisi icbari tibbi sığorta haqqını aylıq olaraq hesablayır və hesabat ayından sonrakı ayın 20-dən gec olmayaraq ödəyirlər.
 
Energetik içkilərə (alkoqollu və alkoqolsuz) və elektron siqaret üçün mayeyə, tütün məmulatlarına, alkoqollu içkilərə aksiz markalarının verilməsinə görə icbari tibbi sığorta haqqı isə vergi ödəyicisi tərəfindən həmin aksiz markalarının alınmasına görə dövlət rüsumu ilə eyni vaxtda ödənilir.
 
Bu qanunun 2020-ci il yanvarın 1-dən qüvvəyə minməsi nəzərdə tutulub.