Bakıda sahibkar aldadılmasından və şikayətinə polisin etinasız yanaşmasından narazıdır.
FED.az biznes portalı "Qafqazinfoya" istinadən bildirir ki, “Sədərək” Ticarət Mərkəzində sahibkar kimi fəaliyyət göstərən Tural Həsənov açıqlamasında bildirib ki, avqustun 30-da özünü Cəbrayıl Kərimov kimi təqdim edən şəxs onun topdansatış mağazasına gəlib: “Biz uşaq oyuncaqlarının satışı ilə məşğul oluruq. Həmin adam mağazaya gəlib çox səmimi danışdı, Nərimanovda saatlı binanın altında mağaza açdığını dedi. İstədiyi oyuncaqların siyahısını verdi, 3 min manatlıq mal yığdım. Sonra dedi ki, malları taksi ilə göndər, həm də bildirdi ki, indi pulu azdır, dükanda verəcək. Mən də dedim gəl öz maşınımla aparım”.
Eləcə də bax: Azərbaycanda «Lukoil» şirkəti «Likoil»un «dərsini verdi» - MƏHKƏMƏ QƏRARI
Tural Həsənov malları maşına yükləyərək yola çıxıb:
“Kukla teatrının yanında bu adam dedi ki, evdə uşaq telefonu paltaryuyan maşının içinə atıb, orada qalıb. Dedi telefonu götürüb gələcək. Mən də həmin küçədə saxlaya bilməyəcəyimi deyib “kruq” vurdum. On dəqiqə sonra ora gələndə gördüm həmin adam ordadır. Bu dəfə isə dedi ki, üstündə pulu azdır, ona bir az pul verim, dükanda qaytaracaq”.
Eləcə də bax: Azərbaycanda iki şirkət «Lukoyl»un əlindən - QURTARA BİLİB – MƏBLƏĞ
Sahibkar həmin adama inanaraq 210 manat pul verib:
“Çıxdı getdi, bir daha gəlmədi. “Azneft”in kruqunu 15-20 dəfə fırlandım, gəlib çıxmadı. Mənə verdiyi telefon nömrəsi də təyin edilməyib, elə bir nömrə yoxdur. O istəyirdi ki, mən malları taksi ilə göndərim, onun da pulunu mənə “atsın”. Amma öz maşınımla gətirdim deyə alınmadı. Ona görə yolda belə bir hərəkət elədi. Mən adamı tapa bilməyəndən sonra saatlı binanın yanına gəldim. Mənə demişdi ki, dükanın adı “Nənəmin balası”dır, gəlib gördüm nə “Nənəmin balası” var, nə də “Dədəmin balası”. Ümumiyyətlə, o tərəflərdə elə bir dükan yoxdur”.
Tural Həsənov məsələ ilə bağlı 102-yə şikayət edib: “Onlar da məni Səbail polisinə yönləndirdi. Orada da polislər məndən izahat aldılar, amma çox laqeyd yanaşdılar. Nə saat soruşdular, nə maşının nömrəsi. Elə ümumi əhvalatı danışdım, onlar da mənə güldülər. Heç bir hərəkət də yoxdur. Bunun işıqlandırılmasını istəyirəm ki, həmin adam başqalarını da aldatmasın”.
Sahibkar bildirib ki, dələduz adlandırdığı həmin şəxsin görüntüləri təhlükəsizlik kameralarına düşüb. O, bu görüntüləri hüquq-mühafizə orqanlarına da təqdim edib.
