Cari ticarət həftəsinə pozitiv istiqamətdə başlayan dollar indeksində tədricən toparlanma müşahidə olunur. Bu gün Amerikada iqtisadi inkişaf səviyyəsi artımla açıqlanarsa, dollar indeksində (DXY) eniş tendensiyası artım trendi ilə əvəzlənə bilər. Təhlillərə əsasən DXY-da 108 bənd həddindəki müqavimət həddi qırılsa, EUR/USD və GBP/USD cütlüklərində trend enişə doğru dəyişə bilər.
Bu gün həmçinin Bakı vaxtı ilə saat 14:00-da Avrozonada açıqlanacaq inflyasiya səviyyəsinə dair göstəricilər investorların diqqət mərkəzində olacaq.
Dollar indeksində müşahidə olunan toparlanma fonunda qızıl bir qədər ucuzlaşıb. Hazırda dünya birjalarında 1754$-dan təklif olunan qiymətli metalın bir unsiya üzrə dəyəri 1750$ həddinin üzərində qaldıqca, artım tendensiyasını 1780$-a kimi davam etdirə bilər.
Məlumat İnvestAZ şirkətinin analitikləri tərəfindən hazırlanıb.
