28 iyun 2024-cü il tarixində “PAŞA Kapital İnvestisiya Şirkəti” QSC-nin anderrayteri olduğu “Kapital Bank” ASC-nin istiqrazları abunə yazılışı üsulu ilə birjaya yerləşdirildi. İstiqrazların buraxılış həcmi 30 milyon ABŞ dolları təşkil edir.
FED.az xəbər verir ki, sənədsiz, adlı, faizli və təmin edilməmiş istiqrazlar premium bazar seqmentində listinqə daxil edilib. Bu istiqrazlar subordinasiya borcu kimi, 7 illik tədavül müddətilə buraxılır. İstiqrazların ödəmə periodu 360 gün əsasında hər 90 təqvim gününün başa çatmasından sonra növbəti 3 iş günündən gec olmayaraq təyin edilib.
“Bakı Fond Birjası” QSC-nin ticarət platformasında həyata keçirilmiş və 8 iyul 2024-cü il tarixində yekunlaşmış abunə yazılışında hərrac zamanı 4 hüquqi və 33 fiziki şəxs olmaqla, ümumilikdə 37 investor tərəfindən sifarişlər yerləşdirilmişdir. Yerləşdirmə prosesində bir istiqrazın qiyməti 100 ABŞ dolları olaraq təyin edilib və ümumilikdə 30 milyon ABŞ dolları məbləğində sifariş təqdim olunub.
Hüquqi şəxslər tərəfindən verilmiş sifarişlərin həcmi 11,613,000 dollar (39%), fiziki şəxslər tərəfindən verilmiş sifarişlərin həcmi isə 18,837,000 dollar (61%) təşkil etmişdir. Gəlirliliyi 7% olan bu qiymətli kağızların hər birinin nominal dəyəri 100 ABŞ dollarıdır. 37 investor tərəfindən 30 milyon ABŞ dolları dəyərində reallaşdırılmış istiqrazlar üzrə ödəmə 8 iyul 2031-ci ildə həyata keçiriləcək.
Dollarda rəqabətli gəlirlilik təklif edən “Kapital Bank” istiqrazlarını əldə etmək istəyən investorlar “PAŞA Kapital” şirkətinin https://www.pashacapital.az/ rəsmi saytı və ya 1548 nömrəsi ilə müraciət edə bilərlər.
