Bu gün ABŞ-da açıqlanacaq inflyasiya səviyyəsinin, əvvəlki aylarla müqayisədə aylıq 0.3%, illik isə 7.3%-ə qədər azalacağı proqnozlaşdırılır.
ABŞ-da proqnozların üzərində açıqlanan əmək bazarına dair rəqəmlər, eləcə də, noyabr ayında əmək haqqı artımının sürətlənməsi inflyasiya qorxularını yenidən alovlandırdı. Ötən həftənin cümə günü açıqlanan ABŞ-da istehsal qiymətləri indeksi xidmət xərclərinin artması səbəbindən keçən ay ilə müqayisədə gözləniləndən bir qədər çox artdı.
FED-in faiz qərarından əvvəl açıqlanacaq inflyasiya göstəricilərinin bazarlarda volatilliyi artıra biləcəyi ehtimal oluna bilər.
Bu gün başlayacaq və qərarları çərşənbə günü açıqlanacaq FED-in Federal Açıq Bazar Komitəsinin (FOMC) toplantısının monetar siyasətlə bağlı qərar mətnində ediləcək dəyişikliklər və FED sədri Jerom Pavelin açıqlamaları bazarların istiqaməti ilə bağlı həlledici rol oynaya bilər.
Əgər dollar indeksində 103.50 səviyyəsindəki psixolji bariyer aşağıya doğru qırılarsa, qiymətlər bu ilin sentyabrından etibarən formalaşan aşağı istiqamətlənmiş kanalın dəstək xəttini test edə bilər ki, bu da 100 bənd hədlərinə təsadüf edir.
Bu gün həmçinin İngiltərədə əmək bazarına dair statistik rəqəmlər, eləcə də Almaniyada inflyasiya səviyyəsi və “ZEW” Biznes Aktivliyi İndeksi kimi önəmli göstəricisi investorların diqqət mərkəzində olacaq.
Dollar indeksindəki geriləmə fonunda qızıl etibarlı liman maliyyə aləti missiyasını uğurla davam etdirir. Təhlillərə əsasən hazırda 1783$-dan təklif olunan qiymətli metalın bir unsiya üzrə dəyəri 1786$ həddini qıra bilsə, 1806$-a kimi bahalaşa bilər.
Məlumat “İnvestAZ İnvestisiya Şirkəti” QSC-nin Analitika Departamenti tərəfindən hazırlanıb.
