Dolların major valyutalar qarşısında təzyiqi dünən də davam edib. EUR/USD valyuta cütlüyü gün ərzində 1.1048 həddindən 1.1007 həddinə kimi ucuzlaşıb. Lakin, bugün səhər saatlarında avro/dollar məzənnəsi 1.1029 qədər bahalaşıb. GBP/USD cütlüyündə də eniş tendensiyası davam edir. Dünən cütlük bir neçə saat ərzində 1.3272 səviyyəsindən 1.3092 səviyyəsinə qədər kəskin şəkildə enib.
Cümə axşamı günü ABŞ-ın Əmək Nazirliyinin dərc etdiyi hesabata əsasən, sentyabrın 28-i bitən həftə üzrə işsizlik müavinəti almaq üçün müraciət edənlərin sayı 6 min nəfər artaraq 225 minə çatıb. Yenilənmiş məlumatlara görə, ötən həftənin nəticələri daha öncə qeyd olunduğu kimi 218 min yox, 219 min təşkil edib. Həmçinin, ölkənin Xidmət Sektorunda Biznes Aktivliyi İndeksi 55.7 bənd səviyyəsindən 55.2 bənd səviyyəsinə qədər geriləyib.
Əlavə olaraq, ötən gün Yaponiya, Almaniya, Avrozona və Böyük Britaniyanın xidmət sektorlarında PMI göstəriləciləri açıqlanıb. Belə ki, iqtisadi aktivlik indeksi Yaponiyada 53.7 bənddən 53.1 bəndədək, Almaniyada 51.2 bənddən 50.6 bəndədək, Avrozonada 52.9 bənd səviyyəsindən 51.4 bənd səviyyəsinə qədər, Birləşmiş Krallıqda isə 53.7 bənddən 52.4 bəndədək zəifləyib.
Türkiyədə isə istehlak qiymətləri 2024-cü ilin sentyabr ayında illik müqayisədə 49.4% artıb. Avqust ayında qiymət artımı 52%-dən aşağı düşdü və 2023-cü ilin iyul ayından bəri ən aşağı göstəricini sərgilədi. Qeyd etmək lazımdır ki, inflyasiya dördüncü aydır ki, zəifləyir.
Bugün bazar iştirakçıları ABŞ-da dərc olunacaq Qeyri-kənd Təsərrüfatı Sektorunda Yeni Yaranan İş Yerlərinin Sayı (NFP) haqqında nəticələri diqqətlə izləyəcəklər. Əlavə olaraq, ölkədə İşsizlik Səviyyəsi və Orta Saatlıq Əmək Haqları göstəriciləri dərc olunacaq.
Məlumat İnvest-AZ İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
