Bugün ABŞ-da statistik məlumatların dərc olunmasının ərəfəsində dollar major valyutalar qarşısında ucuzlaşır. EUR/USD valyuta cütlüyü ötən gün 1.0833 həddində ticarət olunsa da, 1.0857 həddinə qədər yüksəlib. Həmçinin, GBP/USD cütlüyü də 1.2847 həddindən 1.2864 həddinə qədər bahalaşıb. Dünən USD/JPY cütlüyü 152.180 səviyyəsindən 154.050 səviyyəsinə qədər bahalaşsa da, eniş tendensiyası qorunur və məzənnə 153.700 səviyyəsində ticarət olunur. Dollar indeksi 0.08% geriləyərək 104.28 bənd təşkil edib.
Dünən ABŞ-da ÜDM və İşsizlik Müavinəti üçün Müraciətlərin Sayı göstəriciləri açıqlanıb. Belə ki, ölkənin ikinci rübdə ÜDM-i ötən rüb ilə müqayisədə, ilkin hesablamaya görə, 2.8% artıb, iyulun 20-də başa çatan həftə üzrə İşsizlik Müavinəti üçün Müraciətlərin Sayı isə 10 min azalaraq 235 min təşkil edib.
Ekspertlərin fikrincə, ümumi mənzərə ABŞ iqtisadiyyatının keçən ildən bəri tədricən yavaşlamağa davam etməsini göstərir, ona görə də FED-in növbəti həftədə yeni yumşalma dövrünə başlamasına təcili ehtiyac yoxdur. Analitiklərin əksəriyyəti (93.3%) hesab edir ki, Federal Ehtiyatlar Sistemi iyulun 31-də uçot faiz dərəcəsini cari illik 5.25-5.5% səviyyəsində saxlayacaq, sentyabrda isə göstəricini endirəcəyini elan edəcək. Mütəxəssislərin əksəriyyəti ilin sonunda ölkədə 4.5-4.75%-lik faiz dərəcəsini proqnoz edirlər.
Eləcə də, bugün ABŞ-da dərc olunan bəzi statistik məlumatlar investorların diqqət mərkəzində olacaq. Bakı vaxtı ilə saat 16:30-da ölkə əhalisinin gəlirlərinə dair rəqəmlər açıqlanacaq. Analitiklərin fikrincə, iyunda ABŞ əhalisinin gəlirləri may ayı ilə müqayisədə 0.4%, xərcləri isə 0.3% artıb.
Məlumat İnvest-AZ İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
