Çərşənbə axşamı və çərşənbə günü ABŞ Federal Ehtiyatlar Sisteminin sədri Cerom Pavelin baş tutacaq çıxışları ərəfəsində dollar major valyutalar qarşısında bir qədər dəyər itirir. Belə ki, EURUSD valyuta cütlüyü 1.0818 həddini test etdikdən sonra 1.0831 həddinə qədər yüksəlib. USDJPY cütlüyü isə 161.100 həddindən 160.870 həddinə qədər ucuzlaşıb. Dollar indeksi 105.00 bənd təşkil edir.
Çərşənbə axşamı FED sədri Konqresin Bank Komitəsi, çərşənbə günü isə Maliyyə Xidmətləri Komitəsi qarşısında çıxış edəcək. İnvestorlar tənzimləyici qurumun rəhbərindən monetar siyasət ilə bağlı gələcək planlar, xüsusən də faiz dərəcəsinin azaldılmasının vaxtı ilə əlaqədar daha çox ipucu əldə etməyə ümid edirlər. Qeyd olunur ki, analitiklərin 77%-i FED-in sentyabr ayında faiz dərəcəsini endirəcəyini proqnoz edir. Ekspertlərin təxminən yarısı isə ilin sonuna kimi uçot dərəcəsinin 4.75-5% səviyyəsində olacağını ehtimal edir.
Həmçinin, ABŞ-da dərc olunacaq inflyasiyaya dair göstəricilər investorlara daha çox ipucu verə bilər. Analitiklər hesab edirlər ki, ölkədə illik inflyasiya may ayı ilə müqayisədə iyun ayında 3.3%-dən 3.1%-ə enib və ilin əvvəlindən bəri ən aşağı səviyyəyə qayıdıb.
Qızılın qiymətləri çərşənbə axşamı səhər Yaxın-Şərq ətrafında yaranmış geosiyasi risklər fonunda bahalaşıb. Nyu-York “Comex” birjasında avqust ayı üzrə qızıl fyuçerslərinin qiyməti 8.3$ və ya 0.35% artaraq 1 troya unsiyası üçün 2371.8$-a qədər bahalaşıb. İnvestorlar Yaxın-Şərqdə baş verən hadisələri diqqətlə izləməyi davam etdirirlər. Çünki, bölgədə vəziyyətin gərginləşməsi “etibarlı liman” maliyyə aktivi kimi, qızıla tələbin artmasına səbəb ola bilər.
Xatırlamaq lazımdır ki, bazar ertəsi Fələstinin “HƏMAS” hərəkatının Siyasi Bürosunun rəhbəri İsmayıl Haniyə bildirib ki, İsrailin hərəkətləri Qəzza zolağında atəşkəslə bağlı danışıqlar prosesinin ləğv olunmasına gətirə bilər. İsrail Müdafiə Qüvvələri isə (IDF) bir gün əvvəl sakinləri Qəzza şəhərinin bir neçə bölgəsindən Fələstin anklavının mərkəzindəki Deyr əl-Bələh bölgəsindəki humanitar zonaya təxliyə olunmağa çağırıb.
Məlumat İnvest-AZ İnvestisiya Şirkətinin analitikləri tərəfindən hazırlanıb.
