Dünən ABŞ ÜDM-nin proqnozların üzərində dərc olunması fonunda dollar major valyutalar qarşısında bahalaşıb.
USD/JPY cütlüyü 1986-cı ildən bəri ən aşağı səviyyəyə, 161.260 həddinə qədər yüksəlib. Hal-hazırda valyuta cütlüyü 160.920 səviyyəsində ticarət olunur. Eyni zamanda, EUR/USD bugün 1.0710 səviyyəsindən 1.0690 səviyyəsinə qədər ucuzlaşıb. Dollar indeksi 0.19% yüksələrək 106.11 bənd təşkil edib.
Yaponiya hökuməti daha əvvəl valyuta bazarını yaxından izlədiyini və yapon yenin həddindən artıq dalğalanmasına qarşı “müvafiq tədbirlər” görəcəyini bildirmişdi. Ekspertlərin fikrincə şifahi müdaxilələr yenanın enişini müvəqqəti olaraq ləngitsə də, onların effektiv olması üçün birbaşa bazar müdaxiləsi ilə dəstəklənməlidir. Bununla belə, bu cür tədbirlərin uğurlu olması qeyri-müəyyən olaraq qalır.
Dünən ABŞ-ın Ticarət Departamentinin İqtisadi Təhlil Bürosu bildirdi ki, üçüncü və yekun qiymətləndirməyə əsasən, ölkə ÜDM-i ötən rübdə illik ifadədə 1.4% artıb. Həmçinin ölkədə 22 iyunda sona çatan həftə üzrə İşsizlik Müavinəti üçün Müraciətlərin Sayı 239 mindən 233 minə qədər azalıb. Analitiklər göstəricinin 236 min səviyyəsində dərc olunacağını proqnoz edirdilər.
Eləcə də, bazar iştirakçıları Yaponiyadan gələn statistik məlumatlarada diqqət yetirirlər. Belə ki, may ayında ölkədə işsizlik səviyyəsi, aprel ayında olduğu kimi, 2.6% təşkil edib, Sənaye Sektorunda İstehsal Həcmi isə 2.8% artıb.
Bugün investorlar Böyük Britaniyada açıqlanacaq ÜDM, Almaniyada işsizlik səviyyəsi və ABŞ-da əhalinin şəxsi xərclərinə dair göstəriciləri diqqətlə izləyəcəklər.
Məlumat İnvest-AZ İnvestisiya Şirkətinin analitikləri tərəfindən hazırlanıb.
