ABŞ dolları çərşənbə axşamı avro və funt-sterlinqə qarşı ucuzlaşaraq aprel ayından bəri ən aşağı həddə çatıb. ABŞ-da iqtisadi məlumatların zəifləməsi Federal Ehtiyatlar Sisteminin faiz endirimlərini ən qısa zamanda həyata keçirəcəyi ilə bağlı ehtimalları gücləndirib. Dünən dərc edilən statistik rəqəmlərə əsasən Sənaye Sektorunda Biznes Aktivliyi İndeksi ardıcıl ikinci ay yavaşlayıb və tikinti xərclərində gözlənilməz azalma oldu.
Bu məlumatların açıqlanmasından sonra, sentyabr ayına qədər faiz dərəcəsinin azaldılması ehtimalı təxminən 59.1%-ə yüksəldi. Bu, həftənin əvvəlindəki 50%-dən bir qədər az olan, keçən cümə günü 55% olaraq qiymətləndirilən ehtimalla müqayisədə əhəmiyyətli artım deməkdir.
Bazar iştirakçıları indi diqqətlərini cümə günü açıqlanacaq və cari iqtisadi şəraitlə bağlı daha çox məlumat verəcəyi gözlənilən ABŞ əmək bazarı rəqəmlərinə yönəldiblər. Analitiklər Federal Ehtiyatlar Sisteminin yüksək faiz siyasətinə və onun iqtisadiyyata təsirinə diqqət çəkərək, məşğulluq məlumatlarının iqtisadi gərginliyin qiymətləndirilməsində əsas rol oynayacağını irəli sürürlər.
Bir qisim analitiklər isə əksinə, FED-in noyabr iclasında faiz dərəcələrini 0.25% artıracağı və ilin sonuna qədər monetar siyasəti cəmi 41 baza bəndi sərtləşdirəcəyini iddia edirlər. İqtisadçıların fikrincə noyabr ayı Federal Ehtiyatlar Sisteminin kritik iclası və ABŞ-da prezident seçkiləri fonunda ABŞ dolları üçün dəyişkən bir dövr ola bilər.
FED-in növbəti iclası istehlak qiymətləri məlumatlarının açıqlanması ilə üst-üstə düşərək iyunun 12-də başa çatacaq. Bu görüşdə monetar siyasətdə hər hansı bir dəyişiklik gözlənilməsə də, rəsmilər yenilənmiş iqtisadi və faiz siyasəti proqnozlarını təqdim edəcəklər.
Avro, funt-sterlinq və yen daxil olmaqla altı əsas valyuta qarşısında dolların dəyərini ölçən dollar indeksi cüzi - 0.05% - geriləyərək 103.99 bəndə düşüb. Avro 0.11% bahalaşaraq martın 21-dən bu yana ən yüksək həddi olan 1.0915$-a, funt-sterlinq isə 0.05% artaraq 1.2814$-a yüksəlib və martın 14-dən bəri ən güclü səviyyəsinə çatıb. USDJPY məzənnəsi isə mayın 21-dən bəri ilk dəfə 156¥ səviyyəsinin altına düşüb.
Avropa Mərkəzi Bankının cümə axşamı keçiriləcək iclasında faiz dərəcələrini aşağı salacağı proqnozlaşdırılır, lakin son inflyasiya məlumatları siyasətçilərin növbəti faiz endiriminin vaxtını yenidən nəzərdən keçirməsinə səbəb ola bilər. Bundan əlavə, İngiltərə Mərkəzi Bankı və Yaponiya Mərkəzi Bankı ayın sonunda potensial əhəmiyyətli siyasi görüşlər keçirəcək.
Digər valyutalara gəldikdə isə, Yeni Zelandiya dolları ABŞ dolları qarşısında 0.6194$-a kimi bahalaşaraq, martın 8-dən bəri ən yüksək həddə çatıb. Avstraliya dolları 0.6690$ səviyyəsində sabit qalaraq, iki həftənin ən yüksək səviyyəsi olan 0.6695$-a yaxın mövqeyini qoruyub.
Məlumat İnvest-AZ İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
