Yapon Yeni çərşənbə axşamı ticarət gününün ilk saatlarında 1$ üçün 150¥ səviyyəsinə yaxın ticarət olunur. FED-in faiz dərəcələrini erkən azaldacağına dair ehtimalların zəifləməsi fonunda dollar dünya birjalarında bir qədər də möhkəmlənib. Bugün həmçinin, uzun müddətdir davam edən ultra-yumşaq pul-kredit siyasətinə son verməsi səbəbilə Yaponiya Mərkəzi Bankının (BoJ) iclası diqqət mərkəzində idi.
Yen dollara nisbətdə cüzi dəyişərək 150¥, avroya qarşı isə 163¥ səviyyəsində sabit qalıb. Avstraliya dolları 0.06% ucuzlaşaraq 0.6520$ olub.
Bugün reallaşan BoJ-un cari iclasında mənfi faiz dərəcəsi siyasətinə son verildi və gəlir əyrisinə nəzarətin və riskli aktiv alışlarının sonlandırıldığı qeyd edildi. Lakin analitiklər hesab edirlər ki, BoJ faiz dərəcələrini qaldırsa belə, pozitiv zonadakı sonrakı artımlar dərhal sonra gəlməyə bilər. Mart və aprel aylarında bir-birinin ardınca faiz artımları olmayacaq.
BoJ toplantısında bank rəsmiləri mənfi faiz siyasətinin sona çatmasından sonra da dəstəkləyici monetar şərtlərin davam edəcəyinə işarə etdilər. Bu mövqe xüsusən də Yaponiya ilə ABŞ arasında faiz uçurumu genişləndikcə, yen üzərində təzyiqi davam etdirə bilər. ABŞ Federal Ehtiyatlar Sisteminin hələ uzun müddət yüksək faiz dərəcələrini saxlayacağı təxmin edilir ki, bu da yenanın mövqeyinə təsir edəcək.
Avstraliya Ehtiyatlar Bankı da (RBA) bugünkü iclasında faiz dərəcələrini sabit saxladı. Qeyd edək ki, analitiklər ən azı avqustun sonuna qədər faiz dərəcələrində dəyişiklik olmayacağını proqnozlaşdırırlar.
Avstraliya dolları həftənin əvvəlində Çindən gələn müsbət iqtisadi xəbərlərdən müəyyən dəstək tapdı, lakin ABŞ dollarının möhkəmlənməsi səbəbindən martın əvvəlində əldə edilən, iki ayın maksimumu olan 0.6667$ səviyyəsində müqavimətlə qarşılaşaraq 0.6520$-a qədər ucuzlaşıb. Yeni Zelandiya dolları da ucuzlaşaraq 0.6060$-dan ticarət olunur.
Avro 1.0870$-a, Britaniya funtu isə 0.05% ucuzlaşaraq 1.2715$-a çatıb. Dolların bərpası, inflyasiyanın hələ uzun müddət yüksək qalacağını göstərən ABŞ-ın son iqtisadi məlumatları ilə dəstəkləndi və investorları FED-in faiz dərəcələrini azaltma cədvəli ilə bağlı ehtimallarını yenidən qiymətləndirməyə sövq etdi.
FED-in bu həftə açıqlayacağı faiz qərarına diqqət yetirən bazar, mərkəzi bankın faiz dərəcələrini nə vaxt azaltmağa başlaya biləcəyinə dair işarələr axtarır. Analitiklət faiz endirimi proqnozlarını redaktə edərək, 2024-cü ildə faiz dərəcələrinin dörd deyil, iki dəfə endirilməsini öngörürlər.
Valyuta səbəti qarşısında dolların məzənnəsini izləyən dollar indeksi, əvvəlki sessiyada iki həftənin ən yüksək səviyyəsi olan 103.65 bəndə çatıb.
Məlumat İnvest-AZ İnvestisiya Şirkətinin analitikləri tərəfindən hazırlanıb.
