Dünən ABŞ-da dərc olunan statistik məlumatlar fonunda, dollar major valyutalar qarşısında bir qədər bahalaşıb. Ötən günə 1.0947 səviyyəsində başlayan EUR/USD cütlüyü, günü 1.0880 səviyyəsində tamamladı. Eyni qaydada GBP/USD və USD/JPY valyuta cütlükləri dünənki ticarət gününə müvafiq olaraq 1.2795 və 147.680 səviyyələrində başlasalar da, gün sonunda 1.2749 və 148.265 səviyyələrində qərarlaşmışdılar. Dollar indeksi 0.08% artaraq, 103.44 bənd təşkil edir.
Dünən açıqlanan məlumatlara əsasən, fevral ayında ABŞ-da Pərakəndə Satış Dövriyyəsinin Həcmi yanvar ayı ilə müqayisədə 0.6% artıb. Məlumatlar proqnozların altında dərc olunub. Belə ki, analitiklər göstəricinin 0.8% artacağını ehtimal edirdilər. Qeyd etmək lazımdır ki, Pərakəndə Satış Dövriyyəsinin Həcmi ABŞ iqtisadiyyatının sağlamlığının ən mühüm göstəricilərindən biridir, çünki istehlak xərcləri ölkənin ÜDM-nin təxminən 70%-ni təşkil edir.
Eyni zamanda, əmək bazarına dair məlumatlar da açıqlanıb. ABŞ-da martın 9-da bitən həftə üçün İşsizlik Müavinətı Üzrə Müraciətlərin Sayı öncəki həftənin yenilənmiş nəticələri ilə müqayisədə 1 min nəfər azalaraq 209 min nəfər təşkil edib. Ekspertlər, əksinə, göstəricinin artacağını proqnozlaşdırmışdılar.
Dolların bahalaşması fonunda qızıl bir qədər eniş tendensiyası sərgiləyir. Həftəyə 2188$ səviyyəsində başlayan dəyərli metal, hal-hazırda 2165$ səviyyəsində ticarət olunur. Nyu-Yorkun “Comex” birjasında qızılın aprel fyuçerslərinin qiyməti 1.95$ və ya 0.09% artaraq 1 troy unsiyası üçün 2169.45$ olub. Analitiklər qızılın ABŞ-dan gələn statistik məlumatlara və FED-in monetar siyasəti haqqında siqnallara qarşı həssas olduğunu qeyd edirlər. Ənənəvi olaraq güclü statistika yüksək dərəcələrə dair gözləntiləri dəstəkləyir, bu da dolların möhkəmlənməsinə və qızılın ucuzlaşmasına kömək edir.
Bugün səhər “Brent” markalı neftin bir barrel üçün dəyəri 86$ həddinin üzərinə qalxdı və sonra cüzi şəkildə eniş göstərdi. “Brent” markalı neftin may fyuçerslərinin qiyməti 0.23% ucuzlaşaraq, bir barrel üçün 85.22$ səviyyəsinə enib. “WTI” markalı neftin aprel fyuçerslərinin qiyməti isə 0.22% ucuzlaşaraq, bir barrel üçün 81.08$ təşkil edib.
Məlumat İnvest-AZ İnvestisiya Şirkətinin analitikləri tərəfindən hazırlanıb.
