Bugün ABŞ-da dərc olunacaq vacib statistik məlumatlar ərəfəsində, dollar major valyutalar qarşısında bir qədər bahalaşıb. EUR/USD, GBP/USD və USD/JPY valyuta cütlükləri müvafiq olaraq 1.0940, 1.2790 və 147.940 səviyyələrində ticarət olunurlar. Dollar indeksi 0.07% azalaraq 102.88 bənd təşkil edib.
Analitiklərin fikrincə fevral ayında ABŞ-da Pərakəndə Satış Dövriyyəsinin Həcmi aylıq ifadədə 0.8% artıb. Rəsmi statistika ölkənin Ticarət Departamentinin bugünki press-relizdə dərc olunacaq. Eyni zamanda, ABŞ-ın Əmək Departamenti martın 9-da bitən həftə üçün ölkədə işsizlik müavinəti üçün müraciət edənlərin sayını açıqlayacaq. Ekspertlər göstəricini 217 min nəfərdən 218 min nəfərə qədər yüksəldiyini proqnozlaşdırıblar.
ABŞ-ın kommersiya məqsədli neft ehtiyatlarında gözlənilməz azalma ilə bağlı məlumatların dərc olunması fonunda, beynəlxalq birjalarda neft qiymətləri bahalaşıb. Ötən günün əvvəlində “Brent” markalı neftin bir barreli 82.50$ səviyyəsində ticarət olunsa da, hal-hazırda bir barrel üçün qiymət 84.50$ səviyyəsindədir. Həmçinin “Brent” markalı neftin may fyuçerslərinin qiyməti 0.1% bahalaşaraq bir barrel üçün 84.11$-a, “WTI” markalı neftin aprel fyuçerslərinin qiyməti isə 0.05% bahalaşaraq 79.76$ təşkil edir.
Bugün səhər dolların digər dünya valyutaları qarşısında möhkəmlənməsi fonunda, qızılın 1 troy unsiyası üçün qiyməti 2175$-a enib. Nyu-York “Comex” birjasında aprel ayı üzrə qızıl fyuçers müqaviləsinin qiyməti 6.05$ və ya 0.28% ucuzlaşaraq, 1 troya unsiyası üçün 2171$-a düşüb. Gümüşün may fyuçerslərinin qiyməti isə 0.05% bahalaşaraq, 1 unsiya üçün 25.168$-a qədər yüksəlib.
Məlumat İnvest-AZ İnvestisiya Şirkətinin analitikləri tərəfindən hazırlanıb.
