Bugün ABŞ-da Federal Ehtiyatlar Sisteminin (FED) yanvar toplantısının protokollarının dərc olunmasından öncə dollar major valyutalar qarşısında dəyər itirib. Dollar indeksi (ABŞ-ın ticarət tərəfdaşı olan altı ölkənin valyuta səbətinə nisbətdə məzənnə) 0.09% azalaraq 103.99 bənd təşkil edib.
FED yanvar toplantısının protokollarını bugün Bakı vaxtı ilə saat 23:00-da dərc edəcək. Hesabatda tənzimləyici qurumun faiz planları ilə bağlı bazar iştirakçıları üçün əlavə ipucları ola bilər. Əksər ekspertlər FED-in uçot faiz dərəcəsini illik 5.25-5.5% səviyyəsində saxlayacağını proqnozlaşdırır. Bununla yanaşı, analitiklərin 77%-dən çoxu faiz dərəcəsinin yalnız iyun ayı üçün azaldılacağını proqnoz edirlər.
ABŞ-da qazın qiymətinin rekord minimuma enməsi yaxın aylarda qazma fəaliyyətinin azalmasına və nəticədə hasilatın azalmasına səbəb ola bilər. Son günlərdə “Henry Hub” kotirovkaları 2020-ci ilin iyul ayından bəri rekord həddə - min kubmetr üçün 60$-dan aşağı səviyyədə qərarlaşıblar. ABŞ-da qazın qiymətinin rekord səviyyədə enməsi ölkədə qışın isti keçməsi və ötən aylarda hasilatın artması ilə əlaqəlidir. Nəticədə, bazarda əhəmiyyətli dərəcədə profisit formalaşıb.
Həmçinin qızılın qiyməti ardıcıl dördüncü ticarət sessiyasında cüzi fərqlə müsbət səviyyədə olmaqla, tədricən artmaqda davam edir. Nyu-Yorkun “Comex” birjasında aprel ayı üzrə qızıl fyuçerslərinin qiyməti 13.95$ və ya 0.68% artaraq 1 troya unsiyası üçün 2 038.05$ təşkil edir. Gümüşün mart fyuçerslərinin qiyməti 1.59% azalaraq 1 unsiya üçün 23.1$ təşkil edib. Qızıl ötən çərşənbə günündən bəri təxminən 1.7% bahalaşıb.
Məlumat İnvest-AZ İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
