Dünən açıqlanan məlumatlara əsasən, üçüncü və yekun qiymətləndirmə nəticəsində, ABŞ-da ÜDM-in həcmi ötən rübdə illik əsasda 4.9% artıb (Əgər ÜDM ardıcıl dörd rüb eyni sürətlə artıbsa). Halbuki, ekspertlər göstəricinin 5.2% səviyyəsində dərc olunacağını proqnozlaşdırmışdılar.
İllik ifadədə, yəni əvvəlki ilin eyni dövrü ilə müqayisədə isə, ABŞ iqtisadiyyatında 2.9%-lik artım qeydə alınıb.
Həmçinin Filadelfiya FED tərəfindən aparılan sorğunun nəticələrinə görə, Biznes Aktivliyi İndeksi dekabrda əvvəlki ayla müqayisədə 4.6 bənd azalaraq mənfi 10.5 bəndə düşüb.
Nəticədə, günə 102.56 bənd səviyyəsində başlayan Dollar indeksi (DXY) geriləyərək günlük şamını 101.83 səviyyəsində bağladı.
Geriləyən DXY fonunda major valyutalar və qızıl dollar qarşısında bahalaşıb. EURUSD, GBPUSD, XAUUSD (qızıl) müvafiq olaraq 1.1000, 1.2690, 2046.00 hədlərinə kimi yüksəliblər. USDJPY və USDCHF məzənnələri isə 142.22, 0.8562 hədlərinə qədər ucuzlaşıblar.
Bugün isə, analitiklər Amerikada FED-in üstünlük verdiyi əsas inflyasiya göstəricilərindən olan Şəxsi İstehlak Xərcləri İndeksinin (PCE) açıqlanması ilə bu ilki inflyasiya ilə bağlı ən son yeniləməni alacaqlar.
İqtisadçılar, PCE qiymət indeksinin noyabr ayında ardıcıl ikinci ayda da sabit qalacağını ehtimal edirlər. Lakin Şəxsi İstehlak Xərclərinin Baza İndeksinin isə 0.2% artdığı düşünülür. Eləcə də, Böyük Britaniyada ÜDM-in həcmi, ABŞ-da Tikinti Üzrə İcazələrin Sayı, birinci əl mənzil bazarında satışlara dair önəmli iqtisadi göstəricilər investorların diqqət mərkəzində olacaq.
Məlumat InvestAZ İnvestisiya Şirkətinin analitikləri tərəfindən hazırlanıb.
Beynəlxalq birjalarda və Azərbaycanda istiqraz, səhm və digər investisiya alətləri ilə əməliyyatları InvestAZ investisiya şirkəti vasitəsilə həyata keçirmək mümkündür.
